Дәррин байлерниң «уйғурларниң милләтләр ара тойлашқандин кейинки муһәббити» намлиқ мақалиси диққәт қозғимақта

Мухбиримиз сада
2019-08-07
Елхәт
Пикир
Share
Принт

Уйғур дияридики уйғур қиз-аяллириниң хитай әрләргә мәҗбурий ятлиқ қилиниватқанлиқи һәққидики хәвәрләр изчил оттуриға чиқип кәлмәктә. Америкалиқ антрополог дәррин байлер йеқинда елан қилған «уйғурларниң милләтләр ара тойлашқандин кейинки муһәббити» намлиқ мақалисидиму мушу мәсилиләр нуқтилиқ мулаһизә қилинған.

Дәррин байлер мақалисиниң башланмисида өз-ара муһәббәтлишип той қилишқа пүтүшкән бир җүп уйғур қиз-йигитниң һекайиси тонуштурулған. Униңда дейилишичә, уйғур йигит чәтәлгә оқушқа чиқип кетиши билән қизниң ата-аниси уни биз хитай әргә ятлиқ қилишқа мәҗбур болуп қалған, шу сәвәбтин бу бир җүп уйғур қиз-йигитниң муһәббити хирисқа дуч кәлгән.

Дәррин байлер мақалисидә йәнә тарихтин буян уйғур вә хитайларниң арилишип той қилиш нисбитиниң интайин төвән болуп кәлгәнликини, һалбуки 2018-йилидин кейин бу нисбәтниң көрүнәрлик дәриҗидә ашқанлиқини баян қилған. У йәнә өзини «биңтуәнниң пидаий җәңчиси» дәп ативалған бир хитайниң түзүп чиққан «уйғур қизлириниң көңлини қандақ утуш керәк» намлиқ аталмиш «никаһ қолланмиси» һәққидә тохталған. Буниңда уйғур қиз-аяллиридин қандақ обейкт таллаш вә улар билән болған муһәббәт җәрянини «қандақ раваҗландуруш» қатарлиқ нуқтиларда тәпсилий чүшәнчә берилгән икән.

Дәррин байлер баянлирида йәнә нөвәттә уйғур диярида яшаватқан бир уйғур қизниң мәлуматлириниму тилға алған болуп, униңда милләтләр ара ара тойлишишниң нөвәттә уйғур дияридики әң җиддий бир мәсилигә айланғанлиқини, нурғун кишиләрниң өзиниң «қошмақ туғқан» и билән той қилишқа зорлиниватқанлиқини сөзләп өткән.

Дәррин байлер мақалисиниң ахирида муһәббәт кәчмишлири оңушсизлиққа учриған бир җүп уйғур қиз-йигитиниң һекайисини қайта тилға елип, пүткүл уйғур җәмийитиниң кәлгүсидики иҗтимаий йүзлинишигә соал қойиду.

Пикирләр (0)
Share
Толуқ бәт