Кишилик һоқуқни көзитиш тәшкилати: «термо фишерниң ‹шинҗаң' ға био-техника сетишни тохтитиши йетәрлик әмәс»

Мухбиримиз әркин
2019-02-27
Елхәт
Пикир
Share
Принт

Кишилик һоқуқни көзитиш тәшкилати америкидики термо фишер ширкитиниң уйғур райониға био-техника әсваблирини сетишни тохтитишиниң зөрүр, әмма йетәрлик әмәсликини билдүргән.

Кишилик һоқуқни көзитиш тәшкилати хитай бөлүминиң директори софийә ричардсон мәзкур тәшкилатниң торида мақалә елан қилип, термо фишер ширкитиниң қарарида нурғун һалқилиқ соалларға җаваб берилмигәнликини тәкитлигән.

Униң илгири сүрүшичә, термо-фишер ширкити уйғур райониға техника сетишни тохтатқан болсиму, лекин буниңда техникиси хата ишларға илитилгән башқа ширкәтләрниң әһвали, термо фишерниң бу содиниң қайта йүз бәрмәсликиниң қандақ алдини алидиғанлиқи шуниңдәк башқа өлкиләрдики хитай сақчилириға техника сетишниң қандақ болидиғанлиқи қатарлиқ мәсилиләр йәнила мәҗһул икән.

Йеқинда «ню-йорк вақти гезити» хитай һөкүмитиниң уйғур районида мәҗбурий «омумий хәлқ саламәтлик тәкшүрүши» елип бериш арқилиқ 34 милйон кишиниң DNA әвришкисини йиғип, ғайәт зор DNA сандини қуруп чиққанлиқи, буниңда термо фишер ширкитиниң уйғур аптоном районлуқ җ х назаритигә сетип бәргән DNA рәтләш әсвабиниң һалқилиқ рол ойниғанлиқини ашкарилиған.

Термо фишер ширкити шу сәвәблик уйғур аптоном райониға био-техникиси сетишни тохтатқанлиқини елан қилған. Мәзкур ширкәт «ню-йорк вақти гезити» гә бәргән баянатида «биз херидарлиримизниң мәһсулатимизни қандақ ишларға ишләткәнлики яки ишлитилидиғанлиқиға көңүл бөлүшни муһим орунға қойимиз» дегән иди.

Софийә ричардсонниң илгири сүрүшичә, «хитайда сода қилидиған ширкәтләр даириләрниң бу техникини қоллинип, еғир дәпсәндичилик садир қилмайду дегән хам хиялда болмаслиқи керәк» икән.

У хитайдики хәлқара ширкәтләрниң ким билән сода қиливатқанлиқини, мәһсулат вә мулазимитиниң қандақ ишларға ишлитиливатқанлиқини дәрһал көздин кәчүрүши, кишилик һоқуққа хилап һәрқандақ бир аламәт байқалса, бу содини дәрһал тохтитиши керәкликини билдүргән.

Пикирләр (0)
Share
Толуқ бәт