Уйғур тәнтәрбийә чолпанлири хитай мәтбуатлирида көпләп тәшвиқ қилинмақта

Мухбиримиз әзиз
2018-06-28
Елхәт
Пикир
Share
Принт

Өткән һәптидин башлап хитайниң һәрқайси ахбарат васитилиридә уйғур дияридин йетишип чиққан уйғур тәнтәрбийә чолпанлири һәққидә көпләп хәвәрләр оттуриға чиқишқа башлиди. Болупму уйғур бокс чолпанлиридин мәмәттурсун чоңниң 2018-йили җакартада өткүзүлидиған асия тәнһәрикәт мусабиқисигә қатнишиш салаһийитигә еришкәнлики һәмдә униң хитай бокс командиси тәркибидә мусабиқигә баридиғанлиқи хитай башқурушидики «тәңритағ» тори вә башқа җайларда көпләп йәр алған.

Уйғурлардин йетишип чиққан васкетбол чолпанлири қатарида абдусалам абдурешитму йеқиндин буян хитай ахбаратлирида көпләп тәшвиқ қилиниватқанлиқи мәлум. Бу йил 22 яшқа киргән абдусалам бу йилниң ичидә америкидики даңлиқ васкетбол командилиридин сәккизидә топ ойниған болуп, булардин «лос анжелис көлчилири», «броклин торлири», «сумурғ қуяшлири» қатарлиқлар америкида кишиләр әң яхши көридиған топ командилири икән. Хәвәрләрдин мәлум болушичә, абдурушет бу йил америкидики әң нопузлуқ кәспий васкетбол әтрити болған NBA ға хитай тәвәсидин қобул қилиниш еһтималлиқи болған бирдин-бир шәхс икән.

Хитай һөкүмити 2018-йилиниң бешида уйғурлардин йетишип чиққан путбол чолпини ерпан һезимни «чәтәлгә чиққан» дегән «җинайәт» биләп әйибләп «сиясий тәрбийәләш мәркизи» гә елип кәткән иди. Бу хәвәр дунядики һәрқайси ахбарат васитилиридә көпләп хәвәр қилинғандин кейин, хитай һөкүмитиниң уйғурларға қаратқан бастуруш сиясәтлири һәр саһә кишилири арисида күчлүк ғулғула қилинған. Көзәткүчиләр бу һәқтә пикир қилип, «хитай һөкүмитиниң нөвәттә уйғур тәнтәрбийә чолпанлирини тәшвиқатқа елип чиқиши уларниң йәнә бир қетим дуня җамаитиниң көзини бойимақчи болғанлиқини көрситиду. Улар мушу арқилиқ уйғурларниң қандақ ‹бәхтияр' турмуш кәчүрүватқанлиқини испатлимақчи,» дейишмәктә.

Пикирләр (0)
Share
Толуқ бәт