Тайланд түрмисидин қачқан йәнә бир уйғур тутулуп қалди

Мухбиримиз әзиз
2017-11-27
Елхәт
Пикир
Share
Принт

20-Ноябирда тайландниң соңкла өлкисидики чеграға йеқин болған бир йиғивелиш мәркизидин 20 уйғур қечип кәткәндин кейин бу вәқә тайланд вә хитай даирилирини пат-парақ қиливәткән иди. Бүгүн бу уйғурлардин йәнә бир кишиниң тутулуп қалғанлиқи мәлум болди.

Малайшиядики әң чоң гезитләрдин болған «қуяш гезити» ниң 26-ноябирдики хәвиригә қариғанда, садав көчмәнләр лагеридин қечип кәткән уйғурлардин йәнә бир киши шу җай вақти сәһәр саәт сәккиздә тутулуп қалған. Соңкла өлкилик көчмәнләр идариси 6-тармақ идарисиниң башлиқи, генерал майор җексада яйсун бу һәқтә мәлумат берип, «31 яшлиқ бу қачқун наштилиқ тапқили орманлиқтин чиққанда тутувалдуқ,» дегән. Униң ейтишичә, тутулуп қалған бу қачқун сақчиларға өзиниң түркийәдики хотун-балилири билән җәм болуш арзусида түрмидин қачқанлиқини сөзләп бәргән.

Җексаданиң билдүрүшичә, бу тутқун бирнәччә тилда сөзлийәләйдиған болуп, малайшия-тайланд чеграсидин өтүп кетишни пиланлиған. Әмма күтүлмигәндә башқа төт уйғур қачқун билән орманлиқтин чиқалмиған. Улар орманлиқта бир һәптә ач қалған болуп, ямғур сүйини ичиш билән җан сақлап кәлгән.

Тайланд вә малайшиядики йәрлик гезитләрдин мәлум болушичә, түрмидин қачқан уйғурлардин алтә киши тутулуп қалғандин кейин бу җайлардики хитай әлчиханиси вә консулханиси дәрһал тайланд һөкүмити билән алақилишип, бу алтә уйғурни тездин хтиайға қайтуруп беришни тәләп қилған. Әмма тайланд һөкүмити бу уйғурларниң дөләт тәвәлики айдиңлашмиғичә уларни һечйәргә маңдурмайдиғанлиқини билдүргән.

Пикирләр (0)
Share
Толуқ бәт