Тайландтики бомбилиқ һуҗумға четилип қолға елинған икки уйғур яшниң соти башланди

Мухбиримиз ирадә
2016-11-15
Елхәт
Пикир
Share
Принт

Ройтерс агентлиқиниң хәвәр қилишичә, өткән йили баңкоктики серин ибадәтханисида йүз бәргән партлашқа четилип қолға елинған мирәли йүсүп вә билал муһәммәд исимлик икки нәпәр уйғурниң дәваси сәйшәнбә күни баңкоктики һәрбий сотта башланди. Уларниң соти өлчәмлик уйғур тили сөзләйдиған тәрҗиман йоқ болуш сәвәбидин үч қетим кечиктүрүлгән иди.

Мәлум болушичә, бу қетимлиқ соттики тәрҗиманни хитай әлчиханиси тәминлигән болуп, мирәли вә билаллар сотта йәнә тәрҗиманға етираз билдүргән. Улар хитай әлчиханиси тәминлигән тәрҗиманни ишлитишни халимайдиғанлиқини, чүнки хитай һөкүмитиниң уйғурларға һөрмәт қилмайдиғанлиқини ейтқан. Бирақ сотчилар бу икки нәпәр тәрҗиманниң уйғурчини раван сөзләйдиғанлиқини, шуңа өзлириниң уларни лайиқ дәп қарайдиғанлиқини ейтип сотни давам қилған.

Билал муһәммәдниң адвокати чучарт канпайниң ройтерс мухбириға ейтишичә, бу тәрҗиманлар уйғур елидин кәлгән вә уйғурчиси раван икән. Шуңа сот давам қилиши мумкин икән. Әмма хәвәрләрдә бу тәрҗиманларниң миллитиниң немә икәнлики ениқ тилға елинмиған.

Фирансийә агентлиқиниң ейтишичә, сотқа көзәткүчи болуп қатнашқан «хәлқара қануншунаслар комитети» асия директори сам зарифи тәрҗиманларниң хитай әлчиханиси тәрипидин тәминлинишиниң һәрбий сотниң адил қарар чиқиришиға қарита җиддий әндишә қозғайдиғанлиқини ейтип, уларниң давасиға һәрбий сотта әмәс, мәмурий сотта қарап чиқишқа чақирған.

Юқиридики бу икки уйғур яш 2015-йили 17-авғуст күни тайландтики даңлиқ серин ибадәтханисиға йүз бәргән бомбилиқ һуҗумдин кейин қолға елинған иди. Анализчилар бу вәқәни 2015-йили 7-айда тайландтин хитайға қайтуруп берилгән 109 нәпәр уйғур муһаҗир мәсилисигә бағлап, буниң уйғур террорчилириниң өч елиш һәрикити болуши мумкинликини илгири сүрүшкән.

Уларниң адвокатиниң ейтишичә, уларниң даваси 2018-йилиғичә давам қилиши мумкин икән.

Пикирләр (0)
Share
Толуқ бәт