Taylandning köchmenler qamaqxanisidin qachqan Uyghur musapirliridin eng axirqi kishi tutulghan

Muxbirimiz erkin
2020-01-14
Élxet
Pikir
Share
Print

Ötken hepte taylandning mukdaxan ölkisidiki bir köchmenler qamaqxanisidin qéchip chiqqan Uyghur musapirliridin eng axirqi kishi 13‏-yanwar kéchisi taylan saqchilirigha tutulup qalghan.

Tayland da'iriliri 10‏-yanwar küni taylandning mukdaxan ölkisige qarashliq mu'ang rayonidiki köchmenler qamaqxanisida tutup turuluwatqan 7 neper Uyghur musapirining qamaqxanidin qachqanliqini élan qilghan. Lékin, uzun ötmey qachqunlardin 6 kishining tayland saqchilirigha tutulup qalghanliqi melum bolghan. Emma, ulardin 33 yashliq mutellipning tutulmay qéchip yürüwatqanliqi, saqchilarning mutellipni tutush üchün shu rayonda axturush élip bériwatqanliqi ilgiri sürülgenidi.

"Bankok pochtisi" gézitining 14‏-yanwar xewer qilishiche, tayland saqchiliri mutellipni 13‏-yanwar küni shu yerning waqti kéche sa'et 11 lerde mukdaxan baziridiki halqisiman bir tashyolda kétiwatqanda tutqun qilghan. Xewerde, uning intayin charchap ketkenliki tekitlen'gen. Melum bolushiche, uning tutulghan jayi ular qachqan köchmenler idarisi qamaqxanisidin 6 kilométir yiraqliqtiken. Xewerde bayan qilinishiche, mutellipni shu jaydiki bir tayland puqrasi saqchigha chéqip qoyghan. U, saqchigha téléfon qilip, namelum bir kishining halqisiman tash yolda kétiwatqanliqini éytqan. Xitay hökümitining Uyghur rayonidiki basturushida 2013‏-2014‏-yilliri nurghun Uyghurlar sherqiy-jenubiy asiya arqiliq türkiyege qachqan. Bu jeryanda nurghun kishiler tayland da'irilirige tutulup qalghan. Tayland hökümiti ularning bir qismining türkiyege kétishige yol qoyghan bolsimu, lékin bir qismi xitaygha qayturup bérilgen. Xitaygha qayturup bérilgen Uyghurlar iz-déreksiz yoqalghanidi.

Mukdaxan ölkilik köchmenler da'irilirining bildürüshiche, qamaqxanidin qachqan 7 neper Uyghur musapiri 22-38 yashlar ariliqida iken. Amérika hökümiti, xelq'ara kishilik hoquq teshkilatliri tayland da'irilirining herqandaq Uyghurni xitaygha qayturup bérishige bolmaydighanliqini tekitlep kelgenidi.

Toluq bet