Тайландниң көчмәнләр қамақханисидин қачқан уйғур мусапирлиридин әң ахирқи киши тутулған

Мухбиримиз әркин
2020-01-14
Елхәт
Пикир
Share
Принт

Өткән һәптә тайландниң мукдахан өлкисидики бир көчмәнләр қамақханисидин қечип чиққан уйғур мусапирлиридин әң ахирқи киши 13‏-январ кечиси тайлан сақчилириға тутулуп қалған.

Тайланд даирилири 10‏-январ күни тайландниң мукдахан өлкисигә қарашлиқ муаң районидики көчмәнләр қамақханисида тутуп турулуватқан 7 нәпәр уйғур мусапириниң қамақханидин қачқанлиқини елан қилған. Лекин, узун өтмәй қачқунлардин 6 кишиниң тайланд сақчилириға тутулуп қалғанлиқи мәлум болған. Әмма, улардин 33 яшлиқ мутәллипниң тутулмай қечип йүрүватқанлиқи, сақчиларниң мутәллипни тутуш үчүн шу районда ахтуруш елип бериватқанлиқи илгири сүрүлгәниди.

«Банкок почтиси» гезитиниң 14‏-январ хәвәр қилишичә, тайланд сақчилири мутәллипни 13‏-январ күни шу йәрниң вақти кечә саәт 11 ләрдә мукдахан базиридики һалқисиман бир ташйолда кетиватқанда тутқун қилған. Хәвәрдә, униң интайин чарчап кәткәнлики тәкитләнгән. Мәлум болушичә, униң тутулған җайи улар қачқан көчмәнләр идариси қамақханисидин 6 километир йирақлиқтикән. Хәвәрдә баян қилинишичә, мутәллипни шу җайдики бир тайланд пуқраси сақчиға чеқип қойған. У, сақчиға телефон қилип, намәлум бир кишиниң һалқисиман таш йолда кетиватқанлиқини ейтқан. Хитай һөкүмитиниң уйғур районидики бастурушида 2013‏-2014‏-йиллири нурғун уйғурлар шәрқий-җәнубий асия арқилиқ түркийәгә қачқан. Бу җәрянда нурғун кишиләр тайланд даирилиригә тутулуп қалған. Тайланд һөкүмити уларниң бир қисминиң түркийәгә кетишигә йол қойған болсиму, лекин бир қисми хитайға қайтуруп берилгән. Хитайға қайтуруп берилгән уйғурлар из-дерәксиз йоқалғаниди.

Мукдахан өлкилик көчмәнләр даирилириниң билдүрүшичә, қамақханидин қачқан 7 нәпәр уйғур мусапири 22-38 яшлар арилиқида икән. Америка һөкүмити, хәлқара кишилик һоқуқ тәшкилатлири тайланд даирилириниң һәрқандақ уйғурни хитайға қайтуруп беришигә болмайдиғанлиқини тәкитләп кәлгәниди.

Пикирләр (0)
Share
Толуқ бәт