Тайланд даирлири түрмидин қачқан 7 нәпәр уйғур мусапиридин әң ахирқи бириниң из- дерикини қилмақтикән

Мухбиримиз әркин
2020-01-13
Елхәт
Пикир
Share
Принт

Өткән һәптә тайландниң мукдахан өлкисигә қарашлиқ муаң районидики көчмәнләрни тутуп туруш орнидин қачқан 7 нәпәр уйғур мусапириниң 6 нәпири тайланд сақчилириға тутулуп қалған. Тайланд таратқулириниң хәвәр қилишичә, нөвәттә уйғур мусапирлиридин техи қолға чүшмигән әң ахирқи бириниң из -дерики қилинмақтикән.

Нөвәттә, тайландниң көчмәнләрни тутуп туруш мәркәзлиридә конкрет қанчә уйғур мусапириниң тутуп турулуватқанлиқи ениқ әмәс. Тайланд һөкүмитиниң 2015‏-йили  7‏-айда йүз нәччә уйғурни хитайға мәҗбури қайтуруп бәргәндин кейин тайланд қамақханилирида 50-60 тәк уйғурниң қелип қалғанлиқи илгири  сүрүлүп кәлгән.

Көзәткүчиләрниң пәрәз қилишичә, өткән һәптә тайланд қамақханисидин қачқан 7 нәпәр мусапир әнә шуларниң бир қисими болуши мумкин икән. Тайландтики « банкок почтиси» гезити 13‏-январ бәргән хәвиридә, уйғур мусапирлириниң 6 нәпириниң сақчиларға тутулуп қалғанлиқи,  лекин бир нәпириниң һазирғичә қечип йүрүватқанлиқи билдүрүлгән.

Хәвәрдә қәйт қилинишичә, уйғур мусапирлиридин 33 яшлиқ мутәллип сақчиларға тутулмай һазирғичә қечип йүрмәктикән. Хәвәрдә, сақчиларниң апшаркиларни ишқа селип, микоң дәряси бойидики бир қанчә белиқчилар йезисини ахтуриватқанлиқи, сақчиларниң мутәллипни мушу районға мөкүвалған болиши мумкин  дәп гуман қиливатқанлиқи тәкитләнгән.

Хитай һөкүмитиниң уйғур районидики бастурушида 2013‏ -2014‏-йиллири нурғун уйғурлар  шәрқий-җәнубий асия арқилиқ түркийәгә қачқан. Қечиш җәрянида нурғун уйғурлар тайланд  даирлириға тутулуп қелип, бир қисминиң түркийәгә кетишигә йол қоюлған болсиму, лекин бир қисми хитайға қайтуруп берилгән. Хитайға қайтуруп берилгән уйғурлар из -дерәксиз йоқалған. Тайланд даирлириниң қилмиши хәлқара кишилик һоқуқ тәшкилатлириниң қаттиқ тәнқидигә учриғаниди. Мукдахан өлкилик көчмәнләр оргини  даирлириниң билдүрүшичә, қамақханидин қачқан 7 нәпәр уйғур мусапири  22-38 яшлар арилиқида икән.

Пикирләр (0)
Share
Толуқ бәт