Тайландтики икки уйғурниң соти тәрҗиман йоқлуқи сәвәблик кечиктүрүлди

Мухбиримиз меһрибан
2016-08-23
Елхәт
Пикир
Share
Принт

Сәйшәнбә күни хәлқара таратқуларда, өткән йили 17-авғуст баңкокта йүз бәргән партлитиш һуҗумиға четишлиқ дәп қолға елинған билал муһәммәд йәни адәм қарадағ вә мирәли йүсүп қатарлиқ икки уйғур үстидин ечиливатқан сотниң тәрҗиман йоқлуқи сәвәбидин кечиктүрүлгәнлики хәвәр қилинди.

Әнглийә б б с агентлиқиниң хәвиридә тилға елинишичә, тайланд һәрбий соти тәрипидин давамлишиватқан сот 23-авғуст сәйшәнбә әсли қәрәлидә башланған болсиму, әмма ақлиғучи тәрәп уйғурчә билидиған тәрҗиман тәминләп берәлмигәчкә кечиктүрүлгән. Америка бирләшмә агентлиқи хәвиридә, сот даирилириниң мухбирларниң йеқинлишишидин сақлиниш үчүн, иккийләнни аптомобил билән удул сот мәһкимисигә елип киргәнлики тилға елинди.

Өткән йили 17-авғуст тайланд пайтәхти баңкокта йүз бәргән партлашта 20 адәм өлүп, 120 дин артуқ адәм яриланған. Тайланд даирилири юқирида исми аталған икки гумандарни қолға алған һәм уларниң хитайдин кәлгән уйғурлар икәнликини елан қилған иди. Әмма булар сақчиларниң өзлирини қийнап иқрар қилдурғанлиқини җакарлап, өзлириниң шу қетимқи партлаш билән мунасивити йоқлуқини билдүргән иди.

Илгири тайланд таратқулири бу һәқтә бәргән хәвәрлиридә, бу вәқә тайланд һөкүмитиниң чеграсидин қанунсиз йоллар билән киргән 109 нәпәр уйғурни хитайға қайтуруп беришигә қарита, уйғурларниң хитайдин өч елиш һәрикити болуши мумкин дегән қарашларниму оттуриға қойған иди.

Пикирләр (0)
Share
Толуқ бәт