دائىرىلەر ئاقسۇدا قۇرۇلغان «گۇمو كىتاب يۇرتى» نى خىتاي تارىخنامىلىرى ئامبىرىغا ئايلاندۇرۇشنى پىلانلىماقتىكەن

مۇخبىرىمىز قۇتلان
2017-05-08
ئېلخەت
پىكىر
Share
پرىنت

خىتاي ھۆكۈمىتى يېقىندىن بۇيان ئۇيغۇر ئېلىدىكى ۋىلايەت ۋە شەھەرلەرنىڭ ناملىرىنى ئارقا-ئارقىدىن ئۆزگەرتىپ، يەر-جاي ناملىرىنى خىتايلاشتۇرۇش دولقۇنىنى قوزغىغان.

خىتاي تاراتقۇلىرىنىڭ خەۋەرلىرىگە قارىغاندا، بۇرۇنقى تۇرپان ۋىلايىتى ئەمەلدىن قېلىپ، ئۇنىڭ ئورنىغا ۋىلايەت دەرىجىلىك تۇرپان شەھىرى تەسىس قىلىنغان. ئەسلىدىكى تۇرپان شەھىرى گاۋچاڭ رايونىغا ئۆزگەرتىلگەن.

ئىلگىرىكى قۇمۇل ۋىلايىتى ئەمەلدىن قالدۇرۇلۇپ، ئۇنىڭ ئورنىغا ۋىلايەت دەرىجىلىك قۇمۇل شەھىرى تەسىس قىلىنغان. ئەسلىدىكى قۇمۇل شەھىرى يىجوۋ رايونى دەپ ئۆزگەرتىلگەن.

دائىرىلەر ئەمدىلىكتىكى قەدىمىنى ئۇيغۇر ئېلىنىڭ جەنۇبىغا قارىتىپ، ئاقسۇ ۋىلايىتىنى ئەمەلدىن قالدۇرۇپ، ئۇنىڭ ئورنىغا ۋىلايەت دەرىجىلىك شەھەر تەسىس قىلىش، ئەسلىدىكى ئاقسۇ شەھىرىنى «گۇمو رايونى» دەپ ئۆزگەرتىش پىلانىنى قەدەممۇ قەدەم ئېلىپ بارماقتىكەن.

ئاقسۇ ئۇچۇر تورىدىن مەلۇم بولۇشىچە، ئاقسۇ شەھىرىدە «گۇمو كىتاب يۇرتى» دېگەن نامدا خىتاي تارىخنامىلىرىنى يىغىپ ساقلايدىغان بىز زور قەدىمكى كىتاب ئامبىرى قۇرۇلۇشقا باشلىغان.

«گۇمو كىتاب يۇرتى» يېقىندا ئوچۇق ئېلان بېرىپ، خىتاي تارىخىدىكى يىلنامىلەر، تارىخىي ۋەسىقىلەر، ئۆگۈت-نەسىھەتلەر، پالنامىلەر، شېئىرىي ئەسەرلەر، كوڭزى-مېڭزى تەلىماتلىرى، خىتاي كلاسسىك ھۆسنخەتلىرى ۋە خىتايچە ئۇسلۇبتىكى رەسىملەر ھەمدە خىتاي تارىخنامىلىرىدىكى ئاقسۇغا دائىر بايانلارنى توپلاشقا باشلىغان.

ھالبۇكى، يۇقىرىقى ئېلاندا ئۇيغۇرچە تارىخىي ئەسەرلەر ياكى كلاسسىك ۋەسىقىلەر ھەققىدە بىر سۆزمۇ تىلغا ئېلىنمىغان.

خىتاينىڭ يېقىنقى سىياسىي تەشۋىقاتلىرىدا ئاقسۇنىڭ قەدىمكى نامىنىڭ خىتاي يىلنامىلىرىدە «گۇمو» دەپ ئاتىلىدىغانلىقى ھەققىدە كۆپلىگەن ماقالە-خەۋەرلەر ئېلان قىلىنىشقا باشلىغان.

كۆزەتكۈچىلەر، دائىرىلەرنىڭ ئاقسۇ شەھىرىدە «گۇمو كىتاب يۇرتى» نى تەسىس قىلىشى ۋە بۇ يەرگە خىتاي تارىخنامىلىرىنى توپلىشى ئەمەلىيەتتە ئاقسۇ شەھىرىنىڭ نامىنى خىتايچە «گۇمو» غا ئۆزگەرتىشنىڭ دەسلەپكى قەدىمىنى ئېلىۋاتقانلىقىنىڭ بېشارىتى، دەپ قارىماقتا.

پىكىرلەر (0)
Share
تولۇق بەت