Uyghur diyarida tangzongza yéyishni ret qilghan Uyghurlarning tutqun qilin'ghanliqi ilgiri sürüldi

Muxbirimiz erkin
2018-06-22
Élxet
Pikir
Share
Print

Musulmanlarning bu yilqi roza héyti xitayning "Tangzongza bayrimi" bilen oxshash bir mezgilge toghra kelgen idi.

Uyghur kishilik hoquq teshkilatlirining ilgiri sürüshiche, xitay hökümiti bir tereptin Uyghur diyarida musulmanlarning roza héytni tebriklishige her xil cheklimilerni qoyup, yene bir tereptin ularni xitaylar bilen tangzongza bayrimi ötküzüshke we tangzongza yéyishke mejburlighan.

Dunya Uyghur qurultiyi peyshenbe küni chet'eldiki bezi xitay ammiwi teshkilatlirigha bergen uchurida xitay da'irilirining xoten, qeshqer, aqsu qatarliq jaylarda tangzongza bayrimini tebrikleshni we tangzongza yéyishni ret qilghan az dégende 40 dek Uyghurni tutqun qilip, "Yighiwélish lagéri" gha solighanliqini bildürdi.

Tangzongza bayrimi sherqiy asiya medeniyet chembirikidiki milletlerning en'eniwi bayrimi bolup, mezkur bayramning xitayda "Urushqaq beglikler" dewride ötken sha'ir chü yüenni xatirileshtin kélip chiqqanliqi ilgiri sürülidu.

Uyghur kishilik hoquq teshkilatlirining ilgiri sürüshiche, musulman Uyghurlarni choshqa yéghi arilashturulidighan tangzongza yéyishke mejburlash ularning diniy étiqadi we yémek-ichmek adetlirige qilin'ghan éghir depsendichilik iken.

Dunya Uyghur qurultiyining bayanatchisi dilshat rishit peyshenbe küni radiyomizgha bergen uchurida yene aqsuning awat, qeshqerning konasheher, xotenning qaraqash nahiyeliride tangzongza yéyishni ret qilghan 100 din artuq a'ilige 50 somdin 1000 somghiche jerimane qoyulghanliqini bildürdi. Uning körsitishiche, xitayning meqsiti Uyghurlarning islamiy étiqadini ajizlashturup, ularni tézrek assimilyatsiye qilish iken.

Xitay hökümiti bu yil chaghanda Uyghurlarni hoylisigha panus ésip chaghanni kütüwélish, xitaylarni teklip qilip birlikte tügürük tügüp yéyishtek pa'aliyetlerge uyushturghan idi.

Toluq bet