Доктор шөһрәт мутәллип америка сәһийә саһәсидә тәсир қозғиған шәхсләрниң бири болуп баһаланди

Мухбиримиз ирадә
2018-10-19
Елхәт
Пикир
Share
Принт

Америкилиқ уйғур биологийә алими, доктор шөһрәт мутәллип америкидики даңлиқ «дәвр» журнили тәрипидин 2018‏-йили сәһийә саһәсидә тәсир қозғиған 50 кишиниң бири болуп баһаланди.

«Дәвр» журнилиниң бу һәқтики хәвиридин қариғанда, мәзкур журнал тәһрир һәйити америкиниң сәһийә хизмәтлириниң тәрәққий қилишиға төһпә қошуп, бу саһәгә йеңилиқ елип кәлгән нурғун дохтур, тәтқиқатчи, тиҗарәт вә сиясий рәһбәрләрни баһалаш, уларниң хизмәтлириниң өзгичилики, сүпити вә яратқан тәсирлирини селиштуруш нәтиҗисидә турғузуп чиқилған икән.

Доктор шөһрәт мутәллип, аниниң сағлам болмиған ғол һүҗәйриси сәвәблик бовақниң туғма йүрәк тиқилмиси, зеһни аҗизлиқ, әмалиқ қатарлиқ ирсийәт кесәлликлиригә гириптар болушиниң алдини елиш тәтқиқати билән күчлүк тәсир пәйда қилған.

«Дәвр» журнили шөһрәт мутәллип бу тәтқиқат нәтиҗиси билән дуняни һәйран қалдурғанлиқини билдүргән.

Қазақистанда уйғур зиялийси аилисидә туғулуп өскән вә русийәдә докторлуқ унвани алған америка ореган штатлиқ сәһийә вә илим-пән университетиниң тәтқиқатчиси доктор шөһрәт мутәллип тәҗрибә арқилиқ генидә кесәллик бар болған маймундин интайин сағлам болған икки маймунни вуҗудқа чиқарған вә бу тәҗрибини инсанларға тәтбиқлаш йолида етилған тунҗи бир қәдәм, дәп көрсәткән иди.

«Ню-йорк вақти» гезити илгири бу һәқтә тарқатқан хәвиридә, шөһрәт мутәллипниң бу тәтқиқатини инсанийәт сәһийә саһәсидики «зор бөсүш» дәп баһалиған.

Пикирләр (0)
Share
Толуқ бәт