Радиомиз мухбири шөһрәт һошурниң тутқундики икки қериндиши қамақтин қоюп берилди

Мухбиримиз меһрибан
2015-12-31
Елхәт
Пикир
Share
Принт

Радиомиз мухбири шөһрәт һошурниң 16 айдин бери хитай бихәтәрлик даирилириниң қолида тутуп туруватқан икки қериндиши қоюп берилди.

Шөһрәт һошурниң бир қериндиши 2014 ‏-йили 6 ‏-айда дөләт бихәтәрликигә хәвп йәткүзүш билән әйиблинип 5 йиллиқ кесилгән вә униң сотлиниш җәрянини шөһрәт һошурға йәткүзгән қалған икки қериндиши бултур 8 ‏-айниң 17 ‏-күни дөләт мәхпийәтликини ашкарилаш билән тутқун қилинған иди.

Шөһрәт һошурниң үрүмчи дөләт бихәтәрлик қамақханисида тутуп турулуватқан бу икки қериндиши түнүгүн йәни 30 ‏-декабир күни сәһәрдә қоюп берилгән, уларниң қоюп берилиши сәвәби һазирчә мәлум әмәс.

Шөһрәт һошурниң қериндашлири тутқун қилинғандин кейин буни америка мәтбуатлири « бир дөләтниң бир мухбирдин өч елиш һәрикити» дәп хәвәр қилған, америка ташқи ишлар министириму бу һәқтә икки қетим баянат елан қилип хитай тәрәпни шөһрәт һошурниң аилә-тавабиатлириға дәхли -тәрз йәткүзмәсликкә чақирған иди.

Мәлум болушичә 16 ай 13 күн давам қилған бу тутуп турулуш давамида америка ташқи ишлар министирлики хитайниң вашингтон әлчиханиси вә бейҗиңдики ташқи ишлар даирилири билән учришишлирида шөһрәт һошурниң қериндашлириниң һәқсиз һалда тутқун қилиш мәсилисини изчил һалда оттуриға қоюп кәлгән. Нәтиҗидә улар һәққидә ечилмақчи болған сот бир қетим кечиктүрүлгән, бир қетим нәқ шу күнлүктә әмәлдин қалдурулған вә 3 ‏- қетимда сот ечилип «дөләт мәхпийәтликини ашкарилаш җинайити» билән әйибләнгән болсиму әмма һөкүм чиқирилмиған иди.

Шөһрәт һошур радиоға ишқа чүшкәндин буян, болупму, уйғур райондики қаршилиқ һәрикәтлирини мәркәзлик һалда хәвәр қилишқа башлиғандин буян, хитай тәрәп уни дәсләптә радиодин чиқиш кетиш, арқидин болса уйғур районидин әһвал игилимәслик һәққидә агаһландуруп вә һәрхил йоллар билән тәһдит селип кәлгән. Шөһрәт һошур бу тәһдитләргә пәрва қилмай хизмитини давамлаштурған вә бу йил ичидә хәлқарада чоң ғулғула пәйда қилған 18- ‏сентәбир бай көмүркан һуҗуми вәқәсиниму тунҗи болуп шөһрәт һошур дуняға ашкарилиған иди.

Пикирләр (0)
Share
Толуқ бәт