Amérika bilen jenubiy koréye shimaliy koréyege qarshi keng kölemlik hawa manéwiri bashlidi

Muxbirimiz erkin
2017-12-04
Élxet
Pikir
Share
Print

Amérika bilen jenubiy koréye düshenbe küni shimaliy koréyening yadro tehditige qarshi keng kölemlik birleshme hawa manéwiri bashlidi.

Mezkur manéwir shimaliy koréye ötken hepte özining qit'eler ara bashqurulidighan bomba sinaq qilghanliqi, uning amérika zéminigha yétip baralaydighanliqini élan qilghandin kéyin bashlan'ghan. Shimaliy koréye manéwirgha inkas qayturup, manéwirning koréye yérim arilini "Yadro urushi girdabigha élip baridighanliqi" ni tekitligen.

Roytérs agéntliqining xewer qilishiche, "Hoshyarliq koziri" namliq 5 künlük manéwirgha F-35, F-22 tipliq küreshchi ayropilanlar, B-1B tipliq bombardimanchi ayropilanlarni öz ichige 230 din artuq urush ayropilani, 12 mingdek esker ishtirak qilidiken. Amérika "Armiye xewerliri géziti" ning xewiride amérika hawa armiye bayanatchisining sözini neqil keltürüp, "Shimaliy koréyening hujumigha qarshi jenubiy koréyeni qoghdashqa teyyar turushni meqset qilidu" déyilgen.

Xitay bilen rusiye ikki terepni özini tutuwélishqa chaqirip keldi. Ular amérika bilen jenubiy koréye manéwirini bikar qilish, buning bedilige shimaliy koréye özining qoral-yaraq programmisini toxtitishini otturigha qoyghan. Lékin xitay manéwirni bikar qilishni teshebbus qilghan bolsimu, biraq uning özining koréye arilining etrapida hawa manéwiri élip bériwatqanliqi ashkarilandi.

"Jenubiy xitay seher pochta géziti" ning xewer qilishiche, xitay haw armiyesining bayanatchisi shin jinké düshenbe küni xitay hawa armiyesi sherqiy déngizning koréyege yéqin hawa boshluqida manéwir élip bériwtqanliqini bildürgen.

Aq sarayning dölet xewpsizlik meslihetchisi mikmastér yekshenbe küni amérika axbarat wasitilirining ziyaritini qobul qilghanda, xitay bilen rusiye shimaliy koréyeni kontrol qilishqa yardem qilsa, bu ularning menpe'itige paydiliq ikenliki, biraq zörür tépilsa uninggha amérika özi taqabil turidighanliqini bildürgen. Mikmastér: "Zörür tépilsa prézidént we amérika özi bir terep qilidu. Chünki, prézidént éytip kelgendek u bu qanliq, jelligür hakimiyetning yer sharidiki eng xeterlik qoral bilen amérikigha tehdit sélishigha yol qoymaydu" dégen.

Toluq bet