Америка билән җәнубий корейә шималий корейәгә қарши кәң көләмлик һава маневири башлиди

Мухбиримиз әркин
2017-12-04
Елхәт
Пикир
Share
Принт

Америка билән җәнубий корейә дүшәнбә күни шималий корейәниң ядро тәһдитигә қарши кәң көләмлик бирләшмә һава маневири башлиди.

Мәзкур маневир шималий корейә өткән һәптә өзиниң қитәләр ара башқурулидиған бомба синақ қилғанлиқи, униң америка земиниға йетип баралайдиғанлиқини елан қилғандин кейин башланған. Шималий корейә маневирға инкас қайтуруп, маневирниң корейә йерим арилини «ядро уруши гирдабиға елип баридиғанлиқи» ни тәкитлигән.

Ройтерс агентлиқиниң хәвәр қилишичә, «һошярлиқ козири» намлиқ 5 күнлүк маневирға F-35, F-22 типлиқ күрәшчи айропиланлар, B-1B типлиқ бомбардиманчи айропиланларни өз ичигә 230 дин артуқ уруш айропилани, 12 миңдәк әскәр иштирак қилидикән. Америка «армийә хәвәрлири гезити» ниң хәвиридә америка һава армийә баянатчисиниң сөзини нәқил кәлтүрүп, «шималий корейәниң һуҗумиға қарши җәнубий корейәни қоғдашқа тәйяр турушни мәқсәт қилиду» дейилгән.

Хитай билән русийә икки тәрәпни өзини тутувелишқа чақирип кәлди. Улар америка билән җәнубий корейә маневирини бикар қилиш, буниң бәдилигә шималий корейә өзиниң қорал-ярақ программисини тохтитишини оттуриға қойған. Лекин хитай маневирни бикар қилишни тәшәббус қилған болсиму, бирақ униң өзиниң корейә арилиниң әтрапида һава маневири елип бериватқанлиқи ашкариланди.

«Җәнубий хитай сәһәр почта гезити» ниң хәвәр қилишичә, хитай һав армийәсиниң баянатчиси шин җинке дүшәнбә күни хитай һава армийәси шәрқий деңизниң корейәгә йеқин һава бошлуқида маневир елип беривтқанлиқини билдүргән.

Ақ сарайниң дөләт хәвпсизлик мәслиһәтчиси микмастер йәкшәнбә күни америка ахбарат васитилириниң зияритини қобул қилғанда, хитай билән русийә шималий корейәни контрол қилишқа ярдәм қилса, бу уларниң мәнпәитигә пайдилиқ икәнлики, бирақ зөрүр тепилса униңға америка өзи тақабил туридиғанлиқини билдүргән. Микмастер: «зөрүр тепилса президент вә америка өзи бир тәрәп қилиду. Чүнки, президент ейтип кәлгәндәк у бу қанлиқ, җәллигүр һакимийәтниң йәр шаридики әң хәтәрлик қорал билән америкиға тәһдит селишиға йол қоймайду» дегән.

Пикирләр (0)
Share
Толуқ бәт