Amérika prézidénti donald tramp bilen shimaliy koréye dölet rehbiri kim jung'unning tarixi uchrishishi ré'alliqqa aylandi

Muxbirimiz irade
2018-06-12
Élxet
Pikir
Share
Print

Amérika prézidénti donald tramp bilen shimaliy koréye dölet rehbiri kim jung'unning tarixi uchrishishi 12-iyun seyshenbe küni sin'gaporda ötküzüldi. Roytérs agéntliqining xewirige qarighanda, shimaliy koréyeni yadrosizlandurush mesiliside étilghan tunji bir qedem bolup hésablinidighan bu tarixi uchrishish axirida ikki dölet rehbiri ortaq bir bayanatqa imza qoyghan.

Ortaq bayanatta, amérika prézidénti trampning shimaliy koréyening bixeterlikini kapalet bilen teminleydighanliqi we shimaliy koréye rehbiri kim jung'un bilen bu döletni yadrosizlandurush basquchida yéqindin hemkarlishidighanliqi, ikki döletning öz-ara munasiwetlirini tereqqiy qildurush, shimaliy koréye hem shundaqla dunyaning tinchliqi we bixeterliki üchün hemkarlishidighanliqidek mezmunlar yer alghan.

Gerche, yuqiridiki ortaq bayanat simwol xaraktérlik bolsimu, emma prézidént tramp uchrishishtin kéyin muxbirlargha qilghan sözide özining shimaliy koréyeni "Yadrosizlandurush tirishchanliqlirini nahayiti qisqa muddet ichide bashlaydu", dep qaraydighanliqini bildürgen. U shundaqla yene ikki terepning ortaq bayanatta ashkarilanmighan bir qisim mesililerde pikir birliki hasil qilghanliqini bildürgen.

Shimaliy koréye rehbiri kim jung'on bolsa sözide "Ikki dölet ötmüshni untup kélechekke yüzlinishke qarar qilduq, dunya yéqinda zor bir özgirishni köridu" dégen.

Simwol xaraktérlik bu uchrishishning kéyinki tereqqiyati közetküchilerning qarishiche, shimaliy koréyening yadrosizlishish mesilisidiki semimiyitige baghliq iken.

Toluq bet