Президент трамп ким җуңун билән көришиш пиланиниң өзгәрмигәнликини билдүрди

Мухбиримиз әркин
2018-05-28
Елхәт
Пикир
Share
Принт

Америка президенти трамп шәнбә күни ақсарайда мухбирларға баянат елан қилип, шималий корейә рәһбири ким җуңун билән көришиш пиланиниң өзгәрмигәнликини билдүрди.

Президент трамп өткән һәптә ким җуңун билән бу йил 12‏-июн күни сингапорда көришиш пиланиниң бикар қилинғанлиқини җакарлиған. У шималий корейә америкиға нәпрәт билән қараватқан әһвалда «икки тәрәп учришишини тоғра дәп қаримайдиғанлиқи» ни билдүргән иди.

Лекин 26‏-май күни җәнубий корейә президенти мун җиен билән билән шималий корейә рәһбири ким җуңун панмунҗумда 2‏-қетим туюқсиз учрашқан. Президент мун җиен учришиштин кейин ахбарат елан қилип, ким җуңунниң корейә йерим арилини ядросизлаштуруш вәдисидә йәнила чиң түридиғанлиқини билдүргән. Президент трамп мун җиенниң юқириқи сөзлиридин кейин ким җуңун билән көришиш пиланиниң өзгәрмигәнликини билдүргән. Мун җиен мухбирларға қилған сөзидә «ким җуңун үчүн ениқ болмиған нуқта униң ядросизлаштуруш ирадиси әмәс, бәлки шималий корейә ядросизлаштурулғандин кейин америка илгирики дүшмәнлик позитсийәсигә хатимә берәмду-йоқ, униң шәхсий бихәтәрликигә капаләтлик қиламду-йоқ, дегән нуқтидур,» дегән.

Ройтерз агентлиқиниң хәвәр қилишичә, ақсарайниң бир хизмәт гурупписи трамп билән ким җуңунниң учришишиға тәйярлиқ қилиш үчүн сингапорға қарап йолға чиққан. Ақсарайниң баяначиси сараһ сандерс 26‏-май шәнбә күни президент трампниң шималий корейә сөһбитиниң бир «сиясий безәк» кә айлинип қелишини халмайдиғанлиқи, униң әмәлий вә узун муддәтлик бир нәтиҗигә еришишни үмид қилидиғанлиқини билдүргән.

Пикирләр (0)
Share
Толуқ бәт