Рус тиллиқ мәтбуатларда уйғурларниң тәқибләшкә учраватқанлиқиға аит язмилар көпәймәктә

Мухбиримиз үмидвар
2017-11-19
Елхәт
Пикир
Share
Принт

Йеқинқи вақитлардин буян рус тиллиқ мәтбуатларда хитайниң уйғур диярида елип бериватқан, миллий, дини вә маарип сиясәтлири саһәсидики бесимларға аит хәвәр анализлири вә мақалиләр көпийишкә башлиған. Мундақ хилдики мақалиләрниң асаслиқ мәнбәлиридин бири әркин асия радиосиниң инглизчә тарқитилған уйғурларға аит тәпсилатлири болмақта.

Рус, инглиз вә өзбек тиллирида тарқитилидиған пәрғанә учур агентлиқиниң торида йеқиндин буян уйғур дияриға аит бир қатар русчә хәвәр анализлири елан қилинған болуп, буларниң һәммиси асасән дегүдәк радиойимизниң инглизчә хәвирини мәнбә қилған. 

Бу хилдики мақалиләрниң бири; «хитайда ислам әсәбийликиниң бәлгилириниң тизимлики түзүлди» дәп аталған болуп, мәзкур мақалидә хотән қатарлиқ җайлардики йәрлик даириләр паш қилған әсәбийликниң бәлгилири, йәни салам бериш, кийим кийиш, чач қоюш, намаз оқуш қатарлиқлардики ипадә шәкиллири вә башқа илгири чиқирилған әсәбийликниң 75 бәлгисигә аит учурлар тонуштурулған.

Булардин башқа йәнә хитай даирилириниң нөвәттә уйғур диярида елип бериватқан «икки йүзлимичиликкә зәрбә бериш» вә «икки йүзлимичиләрни тепип чиқиш» қа аит бир парчә тәпсилатму берилгән болуп, буниңда йеқинда бортала даирилири чиқарған «икки йүзлимичилик» ниң бәлгилири вә уларни паш қилишқа аит еландики учурлар асас қилинған.

Рус тилида тарқитилидиған ислам диниға аит тор бәтләрдин «ислам-тодәй» торидиму әркин асия радиоси хәвәрлири мәнбә қилинип, уйғур диярида йәрлик мусулманларға, җүмлидин уйғурларниң дини етиқадиға қарита тәқибләш елип берилип, уларниң қуран вә җәйнимазлириниңму йиғивелинғанлиқи һәм башқа пикирләр оттуриға қоюлған. 

Булардин башқа йәнә мисирдики уйғур оқуғучилар мәсилиси, уйғур дияридики «йепиқ тәрбийиләш мәркәзлири» гә йиғивелиш мәсилиси, мәктәпләрдә уйғур вә қазақ тиллириниң чәклиниши қатарлиқларму хәвәр обйекти болған. Һәтта 10-айда «москва сөзләйду» дәп аталған пүтүн русийә характерлик радио истансиси москва уйғур җәмийити рәиси рәфқәт садиқоф билән мәхсус уйғур дияри вә уйғурлар вәзийити һәққидә сөһбәт өткүзүп, айрим тәпсилатларни елан қилди.

Пикирләр (0)
Share
Толуқ бәт