5000 Нәпәр оқутқучи-кадир қош тил йәслилиригә әвәтилидикән

Мухбиримиз ирадә
2017-09-07
Елхәт
Пикир
Share
Принт

Уйғур аптоном район даирилири бу йил 5000 нәпәр кадир вә оқутқучини җәнубтики йеза қош тил йәслилиридә вәзипә өтәшкә әвәтидикән.

«Шинҗаң әтигәнлик гезити» дә елан қилинған хәвәрдин қариғанда, бу, җәнубтики 3 вилайәт бир областтики йеза қош тил йәслилиригә оқутқучи йетишмәслик мәсилисини һәл қилиш үчүн елинған тәдбир икән.

Хәвәрдә көрситилишичә, қош тил йәслилиригә әвәтилидиған хадимлар 2017-йиллиқ күз пәсиллик оқуш мәвсумидин башлап 2020-йилиғичә болған арилиқта аптоном район миқяси бойичә йеңидин дөләт мәмурлиқиға қобул қилинған 3000 нәпәр кадир вә 2000 нәпәр йеңи оқутқучини өз ичигә алидикән.

Пиланға асасән, ақсу вилайитигә 1200 нәпәр, қизилсуға 400 нәпәр, қәшқәр вилайитигә 2000 нәпәр, хотән вилайитигә 1400 нәпәр оқутқучи -кадир әвәтилидикән.

Уйғур аптоном район даирилири уйғур елиниң җәнубидики йезиларда қош тил йәсли қурулушини тез сүрәт билән омумлаштуруш үчүн бу йилниң бешида «селишқа тегишликини чоқум селиш», «йәслигә киришкә тегишлики чоқум йәслигә кириш» дәп нам берилгән нишан бойичә бу йил сентәбиргичә 4408 йеңи йеза қош тил йәслилирини ишқа кириштүрүп болған иди.

Уйғур елидә көпләп селиниватқан қош тил йәслилириниң оқутқучи мәсилисиниң қандақ һәл болидиғанлиқи диққәт қозғаватқан мәсилиләрниң бири.

Чәтәлләрдики көзәткүчиләр хитай һөкүмитиниң буни ичкири өлкиләрдин адәм йөткәш арқилиқ һәл қилидиғанлиқини мөлчәрлимәктә.

Дәрвәқә, техи йеқинда истансимиз йәкән наһийисидики мушундақ қош тиллиқ йәсли вә оттура-башланғуч мәктәпләргә қобул қилинидиған 3000 нәпәр оқутқучи саниниң пүтүнләй ичкири өлкиләрдин қобул қилинған хитай кандидатлар билән толдурулғанлиқини ениқлап чиққан иди.

Пикирләр (0)
Share
Толуқ бәт