Қирғизистан буниңдин кейин дөләт хизмәтчилириниң пүтүнләй қирғиз тили ишлитишини қарар қилди

Мухбиримиз үмидвар
2017-11-26
Елхәт
Пикир
Share
Принт

24-Ноябир күни қирғизистанда йеңи президент соронбай җейенбеков қәсәм берип вәзипигә олтуруш билән тәң қирғизистан баш министири буйруқ елан қилип, 2019-йилидин етибарән қирғизистандики пүтүн һөкүмәт хизмәтчилири чоқум қирғиз тилини билишини тәләп қилди.

Оттура асия учур ториниң хәвәр қилишичә, қирғизистан баш министири сәпәр иссақофниң өткән җүмә күни қол қойған бу һәқтики буйруқида барлиқ дөләт вә пуқралар хизмәтчилири, район хизмәтчилири, алий, асасий, юқири вә төвән дәриҗилик мәмурий вәзипиләрдикиләрниң чоқум дөләт тили, йәни қирғиз тилини билиши тәләп қилинған.

Қирғиз тилини өгиниш үчүн 2018-йилидин етибарән қирғизистан маарип министирлиқиниң мәхсус дәрслик тәйярлап чиқириши бәлгиләнгән.

Мәлумки, қирғизистан көп милләтлик дөләт болуп, қирғизлар аһалиниң 72% ни тәшкил қилиду. Униң кейин қалса өзбәкләр, 14%ni, руслар 6. 4%ni Тәшкил қилиду. Улардин кейин, уйғур, туңган, таҗик, түрк вә башқилар бар. Қирғизистанда йәнә украин, герман қатарлиқ явропа милләтлириму яшайду. Буларниң һәммиси өз миллий тил-йезиқиға игидур.

Қирғизистанда әслидә қирғизлардин кейинла руслар асаслиқ милләт болсиму, бирақ қирғизистан мустәқил болғандин кейин көплигән руслар русийәгә кәткән болуп, һазир 369 миң әтрапида рус яшайду вә уларниң хели көп қисми бишкәк шәһиригә җайлашқан. Улар арисида көп сандики кишиләр һөкүмәт, сақчи-армийә, дохтурхана, маарип, пән-техника вә башқа орунларда хизмәт қилиду һәм улар арисида хели көп сандики һәр дәриҗилик вәзипә өтәватқан кишиләр бар икән.

Қирғизистанниң бу йеңи бәлгилимиси бойичә русларни өз ичигә алған барлиқ милләтләрдин келип чиққан һөкүмәт хизмәтчилири қирғиз тилини билиши керәк икән.

Буниңдин башқа йәнә қазақистан вә қирғизистанда сабиқ совет иттипақи дәвридә өз ана тилини билиш төвәнләп кетип, мутләқ көп қисим қазақ вә қирғизлар, болупму шәһәр аһалисиниң өз тилини яхши билмәслик вәзийити шәкилләнгән иди. Әнә шундақ рус тили маарипида йетишкән нурғун кишиләр бу җумһурийәтләрдики түрлүк рәһбири хизмәтләрни өтимәктә. Шу сәвәбтин қазақистан, қирғизистан, өзбекистан вә түркмәнистан қатарлиқ оттура асия җумһурийәтлири өз тиллирини омумлаштурушқа изчил көңүл бөлүп кәлмәктә иди.

Толуқ бәт