Қирғизистандики хитай әлчиханиси аманлиқ тәдбирлирини күчәйткән

Мухбиримиз әркин
2019-02-08
Елхәт
Пикир
Share
Принт

Хитайниң қирғизистанда турушлуқ әлчиханиси аманлиқ тәдбирлирини күчәйтип, әлчихана сиртиға қораллиқ муһапизәтчиләрни орунлаштурған. Хитай әлчиханисиниң бу һәрикити қирғизистан таратқулириниң диққитини қозғиған. Бәзи көзәткүчиләр, әлчиханиси сиртиға қораллиқ муһапизәтчиләрниң орунлаштурулуши йеқинда йүз бәргән бишкәк шәһиридики хитайға қарши намайишлар билән мунасивәтлик болуши мумкин, дәп қаримақта. Лекин хитай әлчиханиси буниң йеқинқи намайиш билән мунасивәтлик икәнликини рәт қилған. Бу йил 17‏-январ күни бишкәк шәһириниң алатав мәйданиға қирғизларниң кәң көләмлик хитайға қарши намайиши партлиған иди. Қирғизистан «қабар» агентлиқиниң билдүрүшичә, хитайниң қирғизистанда турушлуқ баш әлчиси шяв чиңхуа 8‏-феврал күни мухбирларни күтүвелип, әлчихана сиртиға қораллиқ муһапизәтчиләрни орунлаштурушниң намайишчиларға қаритилмиғанлиқини илгири сүргән. У әлчиханиларниң қаттиқ қоғдилидиған истратегийилик орун икәнликини әскәртип, «муһапизәтчиләрниң күчәйтилишиниң йеқинқи намайишлар билән алақиси йоқ» дегән. Униң ашкарилишичә, хитай рәиси ши җинпиң пат йеқинда қирғизистанни зиярәт қилидикән. У ши җинпиңниң зиярити хитай-қирғиз мунасивәтлиридә «йеңи сәһипә ачидиғанлиқи» ни илгири сүргән. Әмма бу сәһипиниң конкрет тәпсилатини чүшәндүрмигән.

Бу йил 17‏-январ алатав мәйданида йүз бәргән намайишта намайишчилар қирғизистан һөкүмитигә хитайниң қирғизистандики кеңәймичиликини тосуш, хитай көчмәнлирини қоғлап чиқириш, қирғизларниң хитайлар билән той қилишини чәкләш, хитайниң қәрзини дәрһал қайтуруп бериш қатарлиқ тәләпләрни қойған. Лекин қирғизистан һөкүмитини намайишни бастуруп 20 дәк намайишчини қолға алған. Бәзи намайишчиларни «миллий өчмәнликкә қутратқулуқ қилиш» билән әйибләп сотқа тартқан иди. Ши җинпиңниң зиярити хәлқарада хитайниң 800 миңдин 2 милйонғичә уйғурни йиғивелиш лагерлириға қамиши қаттиқ наразилиққа учрап, буниңға алақидар хитай әмәлдарлирини җазалаш тәләп қилиниватқан бир мәзгилдә елип берилиду.

Пикирләр (0)
Share
Толуқ бәт