Қирғизистанлиқларниң хитай визиси елиши қийинлашқан

Мухбиримиз үмидвар
2017-04-30
Елхәт
Пикир
Share
Принт

Пәрғанә учур ториниң хәвәр қилишичә, йеқиндин буян хитайниң қирғизистандики консулханиси қирғизистан пуқралириға виза беришни тохтитип қойған. Буниң билән хитай билән сода қилидиған ширкәт хадимлири яки шәхсий тиҗарәт қилидиғанларға қийинчилиқ келип чиққан.

Хитай тәрәп өзиниң немә үчүн виза беришни тохтатқанлиқини чүшәндүрмигән болуп, нәтиҗидә тиҗарәтчиләр вә йүк аптомобил шопурлири өзлиригә керәклик малларни елип келиш үчүн хитай тәрәпкә баралмиғанлиқидин нарази болушқан, әмма хитай тәрәп йүк аптомобиллири вә хитай содигәрлири йәнила әркин һалда қирғизистанға кәлмәктә икән.

Хәвәрдә көрситилишичә, бу йил январдин башлап хитайниң қирғизистандики әлчиханисиниң консул бөлүми виза беҗириш һөҗҗәтлирини илгирикидин мурәккәпләштүргән болуп, улар визаға илтимас қилғучиниң бармақ изини тәләп қилишни башлиған.

Өткән йили 30-авғуст күни бишкәктики хитай әлчиханиси һуҗумға учриғандин кейин, хитай тәрәп бир мәзгил виза беришни тохтитип қойған болсиму, әмма арилиқта йәнә әслигә кәлтүргән икән. Азадлиқ радиосиниң хәвиридә йезилишичә әмма виза елиш қийинлашқан, һәтта саяһәт визиси тохтитилған икән.

Мәлумки, хитай билән қирғизистан арисидики сода-иқтисадий алақиләр изчил актип һалда болуп, нурғунлиған қирғизистанлиқлар хитай визисиға еришип, қошна уйғур дияри вә ички хитай чоң шәһәрлиридин һәр хил мәһсулатларни киргүзүп, сода қилиду,шуниңдәк йәнә көп сандики хитай пуқралириму қирғизистанда сода ишлири билән шуғуллинип кәлмәктә иди.

Пикирләр (0)
Share
Толуқ бәт