Qirghizistanda imamlargha "Qutadghu bilig"din ders ötüldi

Muxbirimiz ümidwar
2017-01-08
Élxet
Pikir
Share
Print

Uchurlardin melum bolushiche, qirghizistanda islam dini xadimlirigha Uyghur qatarliq türkiy xelqlerning büyük klassik meniwi mirasliridin "Qutadghu bilig"din ders ötüsh yolgha qoyulghan.

Qirghizistanning "24.Kg" agéntliqining bu heqtiki xewiridin melum bolushiche, qirghizistandiki "Iman" fondining re'isi qirghizistandiki imamlargha yüsüp balasaghunining "Qutadghu bilig" namliq esiridin ders ötüsh bashlan'ghanliqini bildürgen.

"Qutadghu bilig" 11-esirde issiq köl etrapidiki balasaghun shehiride tughulup, hayatini qaraxanilar sulalisining paytexti qeshqerde ötküzgen we shu yerge depne qilin'ghan yüsüp xas hajipning didaktik dastanidur. Yüsüpke qaraxaniylar ordisi teripidin "Xas hajipliq" unwani bérilgenliki üchün u adette yüsüp has hajip dep atalghan.

Qirghizlar hazir yüsüp has hajipni"Jüsüf balasaghini" dep atishidu.

Melum bolushiche, qirghizistanda imamlargha "Qutadghu bilig"tin ders ötüsh 2016-yili, yüsüp has hajip tughulghanliqining 1000 yilliqi munasiwiti bilen bashlan'ghan iken, chünki yüsüp has hajipning "Qutadghu bilig" namliq büyük esiride din'gha, ilim-pen'ge, kishilik exlaq-pezileke a'it köpligen telimatlar orun alghanliqi üchün mezkur eserdiki bir qisim parchilar ders süpitide tallan'ghan. Imamlar ders axirida özliri ögen'gen matériyallar boyiche imtihan béridiken.

"Qutadghu bilig" esiri köp xil tillargha terjime qilin'ghan bolup, hazirqi zaman Uyghur tilidiki shé'iri we nesriy nusxisi hem faksimili 20-esirning 80-90-yillirida yoruq körgen. Shuningdek bu eser heqqide köpligen tetqiqatlar, sherhileshler meydan'gha keldi we hetta eserning awazliq nusxisimu élan qilin'ghan.

Toluq bet