Қирғизистанда имамларға «қутадғу билиг»дин дәрс өтүлди

Мухбиримиз үмидвар
2017-01-08
Елхәт
Пикир
Share
Принт

Учурлардин мәлум болушичә, қирғизистанда ислам дини хадимлириға уйғур қатарлиқ түркий хәлқләрниң бүйүк классик мәниви мираслиридин «қутадғу билиг»дин дәрс өтүш йолға қоюлған.

Қирғизистанниң «24.Кг» агентлиқиниң бу һәқтики хәвиридин мәлум болушичә, қирғизистандики «иман» фондиниң рәиси қирғизистандики имамларға йүсүп баласағуниниң «қутадғу билиг» намлиқ әсиридин дәрс өтүш башланғанлиқини билдүргән.

«Қутадғу билиг» 11-әсирдә иссиқ көл әтрапидики баласағун шәһиридә туғулуп, һаятини қараханилар сулалисиниң пайтәхти қәшқәрдә өткүзгән вә шу йәргә дәпнә қилинған йүсүп хас һаҗипниң дидактик дастанидур. Йүсүпкә қараханийлар ордиси тәрипидин «хас һаҗиплиқ» унвани берилгәнлики үчүн у адәттә йүсүп һас һаҗип дәп аталған.

Қирғизлар һазир йүсүп һас һаҗипни«җүсүф баласағини» дәп атишиду.

Мәлум болушичә, қирғизистанда имамларға «қутадғу билиг»тин дәрс өтүш 2016-йили, йүсүп һас һаҗип туғулғанлиқиниң 1000 йиллиқи мунасивити билән башланған икән, чүнки йүсүп һас һаҗипниң «қутадғу билиг» намлиқ бүйүк әсиридә динға, илим-пәнгә, кишилик әхлақ-пәзиләкә аит көплигән тәлиматлар орун алғанлиқи үчүн мәзкур әсәрдики бир қисим парчилар дәрс сүпитидә талланған. Имамлар дәрс ахирида өзлири өгәнгән материяллар бойичә имтиһан беридикән.

«Қутадғу билиг» әсири көп хил тилларға тәрҗимә қилинған болуп, һазирқи заман уйғур тилидики шеири вә нәсрий нусхиси һәм факсимили 20-әсирниң 80-90-йиллирида йоруқ көргән. Шуниңдәк бу әсәр һәққидә көплигән тәтқиқатлар, шәрһиләшләр мәйданға кәлди вә һәтта әсәрниң авазлиқ нусхисиму елан қилинған.

Пикирләр (0)
Share
Толуқ бәт