Қирғизистан мустәқил болғандин кейин 50 миң қирғиз өз вәтинигә қайтип кәлгән

Мухбиримиз үмидвар
2016-06-27
Елхәт
Пикир
Share
Принт


1991 - Йили, совет иттипақиниң йимирилиши билән оттура асия җумһурийәтлири мустәқиллиқ җакарлиғандин кейин, чәтәлләрдә яшаватқан мәзкур җумһурийәтләрниң игилик һоқуқлуқ милләтлириниң өз мустәқил дөлитигә қайтип йәрлишиши башланған иди. Мәтбуат хәвәрлиридин мәлум болушичә, оттура асиядики зәмин даириси бир қәдәр кичик һесаблинидиған қирғизистан җумһурийитигә 25 йилдин буян чәт ‘әлләрдә яшайдиған қирғизлардин 50 миң адәм қайтип келип маканлашқан, буниң ичидә 40 миң әтрапида киши қирғизистан пуқралиқини қобул қилған, қалғанлири пәқәт туруш рухсити билән яшимақта икән.

Азадлиқ радиосиниң хәвәр қилишичә, қирғизистанға қайтип келип, маканлашқан чәтәл қирғизлири ичидә өзбекистан қайтип кәлгән әң көп икән. Йәни, өзбекистандин 19миң 446 нәпәр, униңдин кейин қалса таҗикистандин 17 миң 736 нәпәр етник қирғиз қайтип кәлгән.

Хәвәрдин мәлум болушичә, уйғур аптоном районида 200 миңға йеқин қирғиз яшаватқан болсиму, әмма улардин қирғизистанға қайтип келип қирғизистан пуқралиқини алғанлар аран 29 нәпәрни, русийәдин қайтип кәлгәнләр 30 нәпәрни, түркийәдин қайтип кәлгәнләр 1 нәпәрни тәшкил қилидикән.

Қирғизистан һөкүмитиниң санлиқ мәлумати бойичә нөвәттә өзбекистанда 350 миң, хитайда 200 миң, таҗикистанда 83 миң, түркийидә 2 йерим миң, афғанистанда 20 миң етник қирғиз яшаватқан болуп, уларниң омуми сани 636 миңдин ашидикән, әмма русийәгә кетип ишләватқан вә туриватқан меһнәт муһаҗирлири чәтәл қирғизлири қатариға киргүзүлмигән.

Толуқ бәт