Қирғизлар намайиш қилип, хитайниң қирғизистандики тәсирини чәкләшни тәләп қилди

Мухбиримиз әркин
2019-01-18
Елхәт
Пикир
Share
Принт

17‏-январ қирғизистан пайтәхти бишкәк шәһиридә хитайға қарши намайиш партлап, хитайниң қирғизистандики тәсирини чәкләш тәләп қилинған. Бу, қирғизистанда йеқинқи бир ай ичидә хитайға қарши партлиған 2‏-қетимлиқ намайиш болуп һесаблиниду. 17‏-январ күни тәхминән 300 дәк қирғизистан пуқраси бишкәк шәһәрдики алатов мәйданида топлинип, қирғизистан парламенти вә һөкүмитигә хитайниң тәсир күчиниң қирғизистанда кеңийишини чәкләшни, җүмлидин хитай пуқралирини қирғизистан пуқралиқиға қобул қилишни мәни қилиш, уларға қирғизистанда ишләш рухсити беришни чәкләш, хитай пуқралирини қирғизистанда турғузмаслиқ, қирғизларниң хитайлар билән той қилишини чәкләш, хитайниң қәрзи пулини қайтуруп бериш қатарлиқ тәләпләрни қойған. Болупму намайишчилар һөкүмәтниң хитайдин алған зор миқдардики қәрз пулини қандақ ишләткәнликигә чүшәнчә беришини тәләп қилған.

Қирғизистан һөкүмити илгири хитайдин 400 милйон доллардәк қәрз елип өзиниң бир електр истансисини қайта-қурған. Лекин бу електр истансиси өткән йили өрүлүп чүшкән иди. «Азадлиқ радийоси» ниң 18‏-январ хәвәр қилишичә, даириләр түнүгүнки намайишта 20 кишини тутқун қилған. Қирғизистан ички ишлар министирлиқи баянатчиси бақит сейтоф, тутқунларниң «җамаәт тәртипини бузған» дәп әйиблинип, һәр биригә 45 доллар җәриманә қоюлғанлиқини билдүргән. «Азадлиқ радийоси» ниң хәвиридә тәкитлинишичә, намайишта бу кишиләр хитайниң уйғур аптоном районидики қирғизларни йиғивелиш лагерлириға қамишиға наразилиқ билдүргән икән. Қирғизистан президенти сорунбай җенбекоф йеқинда «қирғизистан-хитай шерикчиликигә бузғунчилиқ қилишқа урунғанларниң қануни җавабкарлиққа тартилидиғанлиқи» ни тәкитлигән иди.

Пикирләр (0)
Share
Толуқ бәт