Хитай һөкүмити қатарға мәхсус һәйәт әвәтип уйғур елидики сиясәтлирини ақлиған

Мухбиримиз ирадә
2019-11-19
Елхәт
Пикир
Share
Принт

Хитай һөкүмити йеқинда «шинҗаң мәдәнийәт алмаштуруш өмики» намидики бир һәйәтни қатарға әвәтип, өзиниң уйғур елидә йүргүзүватқан сиясәтлирини ақлиған.

Тәңритағ тори өзиниң бу һәқтики хәвиридә төвәндикиләрни баян қилған:

«Мәзкур һәйәт 17-ноябирдин 18-ноябирғичә қатардики һәр саһә вәкилләргә шинҗаңниң муқимлиқни қоғдаш, иқтисадий тәрәққият, хәлқ турмушини яхшилаш, милләтләр иттипақлиқи, динлар инақлиқи һәмдә террорлуққа қарши туруш, әсәбийликни түгитиш күриши қатарлиқ җәһәтләрдә қолға кәлтүргән көрүнәрлик нәтиҗиләрни тонуштурди».

Қатар бу йил 7-айда б д т да хитайниң уйғурларға тутқан сияситини қоллап имза қойған 50 дөләт ичидин чекинип чиққан бирдин-бир дөләт иди. Қатарниң б д т дики вәкили әли әл-мәнсори әйни чағда бу һәқтики баянатида: «бу бирләшмә мәктупқа имза қоюшниң қатарниң ташқи сияситидики битәрәпликигә вә бу җәһәттики әвзәлликигә тоғра кәлмигәнликини һес қилдуқ. Мушу сәвәбтин биз битәрәп болушни халаймиз» дегән.

Шуңа хитай һөкүмитиниң қатарға қарита бундақ бир тәшвиқат зиярити тәшкиллиши диққәт қозғайдикән.

Мәлум болушичә бу аталмиш «мәдәнийәт алмаштуруш өмики қатардики бир қисим ислам тәтқиқат мәркәзлиридә, университетларда зиярәттә болған вә мухбирлар билән учришип, уларға уйғур елиниң аталмиш «террорлуққа қарши туруш вә әсәбийликни түгитиш» вәзийити, вә шундақла хитай һөкүмити «кәспий маһарәт тәрбийәси» дәп ативалған қайта тәрбийә лагерлири һәққидә «шинҗаңда қанун бойичә кәспий маһарәт тәлим-тәрбийә мәркизи қуруш арқилиқ. . . Террорлуқ һәрикитини йүз бериштин бурун тиришип түгитип. . . Шинҗаңниң иҗтимаий муқимлиқини ишқа ашурулди. Бу усул җуңгониң асасий қануни вә қанунлириниң роһиға, хәлқара җәмийәтниң террорлуққа қарши туруш, әсәбийликни түгитиш пиринсипиға, дунядики һәрқайси әл хәлқиниң түп мәнпәәтигә тамамән уйғун» дегән.

Һалбуки, дәл хитайниң юқиридики бу өмики қатарда зиярәттә болуватқан мәзгилдә хитай һөкүмитиниң уйғур елидики лагер сияситигә аит 403 бәтлик бир мәхпий һөҗҗити ашкарилинип кетип, хитай һөкүмитиниң уйғурларға қаратқан сияситиниң маһийитини толуқ намаян қилип бәргән иди. Бундақ бир шараитта уларниң бу тәшвиқатлириниң қанчилик тәсир көрситидиғанлиқи намәлум.

Бирақ хәвәрдә ейтилишичә, юқиридики аталмиш «мәдәнийәт алмаштуруш өмики» дики 6 киши қатардики зияритини ахирлаштурғандин кейин, кувәйт вә сәуди әрәбистанда зиярәттә болидикән.

Пикирләр (0)
Share
Толуқ бәт