Pakistanliq tijaretchilerning lagérdiki Uyghur ayallirining köp qismi qoyup bérilgen

Muxbirimiz erkin
2019-04-30
Élxet
Pikir
Share
Print

Pakistan da'irilirining ilgiri sürüshiche, xitay hökümiti yighiwélish lagérlirigha qamiwalghan pakistanliq tijaretchilerning Uyghur ayallirini qoyup bérishke bashlighan.

Pakistanning gilgit-baltistan fédératsiye rayonluq hökümitining bayanatchisi fa'izullah raxman firansiye agéntliqigha bergen uchurida lagérdiki "Mutleq köp qisim" ayallarning qoyup bérilgenlikini delilligen. Lékin, fa'izullah raxman zadi qanche ayalning tutqun qilin'ghanliqi, hazir qanchisining qoyup bérilgenliki we qanche ayalning dawamliq tutup turuluwatqanliqini tilgha almighan. Xitay hökümiti 2017‏-yili 2‏-ayda Uyghurlarni keng kölemlik tutqun qilip, lagérlargha qamashqa bashlighanda pakistanliqlargha nikahlan'ghan nurghun Uyghur ayallirinimu tutqun qilghan. Bu, tutqunlarning perzentlirining anisiz qélishini keltürüp chiqirip, pakistanliq a'ililerning qattiq naraziliqini qozghighan. Lékin, pakistan hökümiti buninggha ashkara ipade bildürüshtin izchil özini qachurup keldi.

Yéqinda pakistan bash ministiri imranxan özining Uyghur rayonida yüz bériwatqan ishlardin xewiri yoq ikenlikini bildürgen idi. Firansiye agéntliqining xewiride bildürülüshiche, ular lagérgha qamalghan 9 neper Uyghur ayalning pakistandiki erlirini ziyaret qilghan bolup, ular ayallirining 3 ayghiche shinjangdin ayrilishigha yol qoyulmaydighanliqi, bu jeryanda ularning qattiq nazaret qilinidighanliqini bildürgen. Ularning erlirining bildürüshiche, da'iriler bu jeryanda bu Uyghur ayallirining xitay jem'iyitige maslishish ehwalini közitidiken. Ayali lagérgha qamalghan pakistanliq bir qashtéshi sodigiri "Ular ayalimning xitay jem'iyitige maslishish ehwalini közitidighanliqi, eger ular uni jem'iyetke maslishalmidi, dep qarisa yene élip kétidighanliqini éytqan" dégen. Firansiye agéntliqining xewiride Uyghur ayallar qoyup bérilgen bolsimu, lékin ularning bedel töleshke mejbur ikenliki bildürülgen. Mezkur Uyghur ayallirining pakistanliq erlirining firansiye agéntliqigha bildürüshiche, ularning ayalliri özlirining "Xitay jem'iyitige maslishidighanliqini körsitishi we diniy idiyeliridin waz kechkenlikini ashkara ipadilishi kérek" iken.

Yéqinda Uyghur rayonigha bérip ayalini yoqlap kelgen pakistanliq bir tijaretchi ayali heqqide toxtilip: "Uning éytishiche ular lagérda choshqa göshi yéyishi, haraq ichishi kérek iken. U buni hazirmu dawamlashturuwétiptu" dégen.

Toluq bet