Пакистанлиқ тиҗарәтчиләрниң лагердики уйғур аяллириниң көп қисми қоюп берилгән

Мухбиримиз әркин
2019-04-30
Елхәт
Пикир
Share
Принт

Пакистан даирилириниң илгири сүрүшичә, хитай һөкүмити йиғивелиш лагерлириға қамивалған пакистанлиқ тиҗарәтчиләрниң уйғур аяллирини қоюп беришкә башлиған.

Пакистанниң гилгит-балтистан федератсийә районлуқ һөкүмитиниң баянатчиси фаизуллаһ рахман фирансийә агентлиқиға бәргән учурида лагердики «мутләқ көп қисим» аялларниң қоюп берилгәнликини дәлиллигән. Лекин, фаизуллаһ рахман зади қанчә аялниң тутқун қилинғанлиқи, һазир қанчисиниң қоюп берилгәнлики вә қанчә аялниң давамлиқ тутуп турулуватқанлиқини тилға алмиған. Хитай һөкүмити 2017‏-йили 2‏-айда уйғурларни кәң көләмлик тутқун қилип, лагерларға қамашқа башлиғанда пакистанлиқларға никаһланған нурғун уйғур аяллириниму тутқун қилған. Бу, тутқунларниң пәрзәнтлириниң анисиз қелишини кәлтүрүп чиқирип, пакистанлиқ аилиләрниң қаттиқ наразилиқини қозғиған. Лекин, пакистан һөкүмити буниңға ашкара ипадә билдүрүштин изчил өзини қачуруп кәлди.

Йеқинда пакистан баш министири имранхан өзиниң уйғур районида йүз бериватқан ишлардин хәвири йоқ икәнликини билдүргән иди. Фирансийә агентлиқиниң хәвиридә билдүрүлүшичә, улар лагерға қамалған 9 нәпәр уйғур аялниң пакистандики әрлирини зиярәт қилған болуп, улар аяллириниң 3 айғичә шинҗаңдин айрилишиға йол қоюлмайдиғанлиқи, бу җәрянда уларниң қаттиқ назарәт қилинидиғанлиқини билдүргән. Уларниң әрлириниң билдүрүшичә, даириләр бу җәрянда бу уйғур аяллириниң хитай җәмийитигә маслишиш әһвалини көзитидикән. Аяли лагерға қамалған пакистанлиқ бир қаштеши содигири «улар аялимниң хитай җәмийитигә маслишиш әһвалини көзитидиғанлиқи, әгәр улар уни җәмийәткә маслишалмиди, дәп қариса йәнә елип кетидиғанлиқини ейтқан» дегән. Фирансийә агентлиқиниң хәвиридә уйғур аяллар қоюп берилгән болсиму, лекин уларниң бәдәл төләшкә мәҗбур икәнлики билдүрүлгән. Мәзкур уйғур аяллириниң пакистанлиқ әрлириниң фирансийә агентлиқиға билдүрүшичә, уларниң аяллири өзлириниң «хитай җәмийитигә маслишидиғанлиқини көрситиши вә диний идийәлиридин ваз кәчкәнликини ашкара ипадилиши керәк» икән.

Йеқинда уйғур райониға берип аялини йоқлап кәлгән пакистанлиқ бир тиҗарәтчи аяли һәққидә тохтилип: «униң ейтишичә улар лагерда чошқа гөши йейиши, һарақ ичиши керәк икән. У буни һазирму давамлаштуруветипту» дегән.

Пикирләр (0)
Share
Толуқ бәт