Хитай җәнуб һава йоллири уйғур елида адәм оргини йөткәйдиған «йешил һава йоли» тәсис қилған

Мухбиримиз әркин
2017-10-09
Елхәт
Пикир
Share
Принт

Игилинишичә, хитай җәнуб һава йоллири ширкитиниң уйғур райони тармиқи адәм ички әзалирини хитай өлкилиригә тез сүрәттә йөткәйдиған «йешил һава йоли» тәсис қилған.

Җәнуб һава йоллириниң йеқинда елан қилған бир тәшвиқат доклатида ашкарилишичә, «йешил һава йоли» 2016‏-йили тәсис қилинғандин буян 500 қетимдин артуқ адәмләрниң ички органини йөткигән.

Хәвәрдә хитайниң җеңҗу шәһиридики шйехе дохтурханисиниң «йешил һава йоли» арқилиқ адәм ички әзалирини йөткәйдиған нишанлиқ дохтурханиларниң бири икәнлики билдүрүлгән. Бу хәвәр, хәлқарадики тәшкилатлар вә паалийәтчиләр, хитайдики сот, тәптиш, сақчи, әдлийә органлириниң бәзи дохтурханилар билән бирлишип, фалунгоңчилар, уйғурлар вә өлүмгә һөкүм қилинған мәһбусларниң ички әзалирини көчүрүп пул тепиватқанлиқиға даир хәвәрләр арқа-арқидин елан қилиниватқан бир мәзгилдә тарқалди.

Уларниң қаришичә, хитай сәһийә министирлиқи хитайда һәр йили 10 миң ички әзаниң көчүрүлидиғанлиқини қәйт қилсиму, бирақ әмили сан буниңдин зор дәриҗидә ешип чүшидикән. Америкидики кишилик һоқуқ паалийәтчиси етан гутман 2016‏-йили елан қилған доклатида, хитайда һәр йили60 миңдин 100 миңғичә ички әза көчүрүлидиғанлиқини илгири сүргән.

Җәнуб һава йоллириниң тәшвиқат доклатида көрситишичә, җәнуб һава йоллириниң шинҗаң тармиқи 2016‏-йили 7 ай ичидә «йешил һава йоли» арқилиқ7 қетим адәм ички әзаси йөткәш вәзиписини тамамлиған. Бирақ җәнуб һава йоллириниң тәшвиқат доклатида бу ички әзалириға қандақ еришкәнликини чүшәндүрмигән.

Уйғур аптоном районида адәм ички әзалирини ианә қилиш түзүми 2013‏-йилдин башлап йолға қоюлған. «Шинҗаң мәркизи шәһәр гезити» ниң йеқинда ашкарилишичә, уйғур аптоном районида ички әза ианә қилиш түзүми йолға қоюлған 4 йил ичидә аран 23 адәм ички әзасини ианә қилған икән.

Пикирләр (0)
Share
Толуқ бәт