Америка ташқи ишлар министирлиқи нурий түркәл һәққидә мәхсус хәвәр бәрди

Мухбиримиз әзиз
2020-06-23
Елхәт
Пикир
Share
Принт

Вашингтон шәһиридики уйғур адвокат нури түркәл йеқинда америка хәлқара диний әркинлик комитетиниң комиссарлиқиға тәйинләнгәндин кейин 23-июн күни америка ташқи ишлар министирлиқи өзлириниң «америкадин һәмбәһирлиниш» сәһиписидә мәхсус нури түркәл һәққидә хәвәр бәрди.

Хәвәрдә әйни вақитта уйғурлар дияридики лагерларниң биридә дуняға кәлгән нури түркәлниң алий мәктәпни пүттүргәндин кейин 1995-йили америкаға оқушқа кәлгәнлики һәмдә шуниңдин кейинки һаят мусаписи қисқичә әсләп өтүлиду. Шундақла униң америкада қанун пәнлиридин унван алған тунҗи уйғур адвокат болуш сүпити билән «уйғур кишилик һоқуқ қурулуши тәшкилати» ниң вуҗудқа келиши, лагерлар мәсилисини дуняға аңлитиш қатарлиқ саһәләрдики тиришчанлиқиға юқири баһа бериду.

Хәвәрдә нури түркәлниң америка хәлқара диний әркинлик комитетиға комиссар болуп тәйинлинишини «америка һөкүмитидин хитай һөкүмитигә әвәтилгән күчлүк сигнал. Бу хитайниң уйғурларни лагерларға қамаш қилмишини һәргизму қобул қилишқа болмайдиғанлиқини тәкитләштур» дәп көрситилиду.

Нури түркәл бу һәқтики зиярәт җәрянида уларға сөз қилип өзиниң йиллардин буянқи уйғур давасида җуғлиған тәҗрибилириниң нөвәттики хизмити үчүн бәкму пайдилиқ болидиғанлиқини тәкитләп: «авази өчүрүлгән бир хәлқ үчүн сөзләш кишигә толиму һузур бәхш етидиған бир хизмәт» дәйду.

Мәлум болушичә, нурий түркәл һәққидә хәвәр берилгән сәһипә америка ташқи ишлар министирлиқиниң дуняға америка һәққидә мәлумат беридиған алаһидә көзники икән.

Пикирләр (0)
Share
Толуқ бәт