Нурбәкри партком муавин секритарилиқ вәзиписидин қалдурулди

Мухбиримиз меһрибан
2014-12-30
Елхәт
Пикир
Share
Принт


Хитай даирилириниң уйғур аптоном райониниң рәиси нур бәкриниң парткомдики вәзипилирини уйғур аптоном районлуқ хәлқ қурултийиниң даимий һәйәт башлиқи шөһрәт закир өткүзүвалидиғанлиқини елан қилиши диққәт қозғиди.

Шинҗаң гезитиниң 30 - декабирдики хәвиридә нурбәкриниң уйғур аптроном районлуқ парткомниң муавин секритарлиқ вәзиписидин қалдурулғанлиқи тилға елинған, әмма униң уйғур аптоном райониниң рәислик вәзиписи һәққидә тохталмиған. Фирансийә радиосида вәзийәт анализчилириниң сөзи нәқил елинип,«өткән икки йилда шинҗаңда зораванлиқ вәқәлири көпәйди. Хитай мәркизи һөкүмитиниң 1961 - йили туғулған нурбәкриниң хизмитини бейҗиңға йөткәп, 1953 - йили туғулған шөһрәт закирни униң орниға тәйинлиши пәвқуладдә әһвал» дейилди.

Нурбәкри 2007 - йилдин буян уйғур аптоном районида рәисилик вәзиписини 7 йил өтиди. Бу мәзгилдә хитай һөкүмитиниң миллий сияситигә қарши 2009 - йилидики 5 - июл үрүмчи наразилиқ намайиши йүз бәрди. 2010 - Йили хитай мәркизи һөкүмити район вәзийитини контрол қилиш үчүн шинҗаң хизмәт йиғини ечип, уйғур елини 19 - өлкиниң ечишиға бөлүп бәрди. 2010 - Йили йәнә, парихорлуқ вә қаттиқ сиясәт йүргүзүш билән нами чиққан уйғур аптоном райониниң партком секритари ваң лечүәнни бейҗиңға йөткәп, униң орниға хунән өлкисиниң партком секритари җаң чүншйәнни тәйинләнди. Әмма 2012 - йилдин 2014 - йилғичә районда барғанчә көпәйгән қаршилиқ һәрикәтлири вә қанлиқ тоқунушлар уйғур елини тинҗимас земинға айландуруп қойғанлиқи хәлқараниң диққитини қозғиди. Өткән айда уйғур аптоном райониниң партком секритари җаң чүншйәнниң вәзиписидин қалдурулидиғанлиқ хәвири тарқалған болсиму, әмма хитай мәркизи һөкүмити бу хәвәрни дәлиллимигән иди.

Пикирләр (0)
Share
Толуқ бәт