Amérika döletlik ammiwi radiyosining muxbiri: "Lagérdikiler özlirining qachan qoyup bérilidighanliqini bilmeydu"

Muxbirimiz erkin
2019-04-26
Élxet
Pikir
Share
Print

Amérika döletlik ammiwi radiyosi (NPR)ning shangxeyde turushluq muxbiri rob shmitéz 25‏-aprél xitay hökümitining teshkillishidiki bir muxbirlar guruppisining terkibide qeshqerni ziyaret qilip, qeshqerdiki bir terbiyelesh lagérini kezgen.

Rob shmitéz 25‏-aprél özining "Qeshqer sheherlik kespiy maharet telim terbiye merkizi" dégen namdiki bu orunda körgen we anglighanlirini twétirda élan qildi. Rob shimitézning bildürüshiche, bu merkezning mijit mahmut isimlik mes'uli bu orunda 20 yashtin 40 yashqiche 1500 kishi barliqi, ularning "Ashqunluq idiyesi bilen yuqumlan'ghanliqi", ularning bu orunda 7 aydin bir yérim yilghiche turidighanliqini ilgiri sürgen. Mijit mahmut muxbirlargha yene bu orunning qeshqerdiki birdin-bir terbiyelesh merkizi ikenliki, "Oqughuchilar" ning her hepte axiri öyige qaytidighanliqini bildürgen. Lékin rob shimitézning bildürüshiche, bu orundiki kishilerning mutleq köp qismigha bir yildek bolghan bolup, héchkim özlirining qachan qoyup bérilidighanliqini bilmeydiken.

Lagérdiki bir ayal uninggha balilirining usul we naxsha éytishigha yol qoymighanliqi üchün bu yerge yollan'ghanliqini bildürgen. Yene bir erkek, ayalining ishlishige yol qoymighanliqi seweblik bu yerge kirgenlikini ilgiri sürgen. Xitay hökümitining 2 milyondek Uyghur we bashqa milletlerni yighiwélish lagérlirigha qamap, lagér sirtidiki Uyghurlarni omumyüzlük nazaret astigha élishi xelq'ara jem'iyetning qattiq tenqidige uchrighandin kéyin, u chet'el diplomatlirini we muxbirlirini bu orunlarni ziyaret qildurushqa bashlighan. Lékin, xelq'ara kishilik hoquq teshkilatlirining ilgiri sürüshiche, xitay hökümiti bu arqiliq xelq'ara jem'iyetning közini boyimaqta iken. Yéqinda xelq'ara kishilik hoquq közitish teshkilati xelq'ara jem'iyetni bu qiltaqqa chüshmeslikke chaqirghan idi.

Rob shimitézning uchuri zor qiziqish qozghap, lagérlargha a'it her xil so'allar qoyuldi. Kanadadiki xitay pa'aliyetchi shawén jangning yollighan uchurida ilgiri sürülüshiche, NPR muxbiri ziyaret qilghan bu orun qeshqer yéngi sheherdiki lagér iken. U bu lagérning sim tosuq we közitish munarlirining bu yilning bashlirida élip tashlan'ghanliqini bildürdi.

Toluq bet