Америка дөләтлик аммиви радийосиниң мухбири: «лагердикиләр өзлириниң қачан қоюп берилидиғанлиқини билмәйду»

Мухбиримиз әркин
2019-04-26
Елхәт
Пикир
Share
Принт

Америка дөләтлик аммиви радийоси (NPR)ниң шаңхәйдә турушлуқ мухбири роб шмитез 25‏-апрел хитай һөкүмитиниң тәшкиллишидики бир мухбирлар гурупписиниң тәркибидә қәшқәрни зиярәт қилип, қәшқәрдики бир тәрбийәләш лагерини кәзгән.

Роб шмитез 25‏-апрел өзиниң «қәшқәр шәһәрлик кәспий маһарәт тәлим тәрбийә мәркизи» дегән намдики бу орунда көргән вә аңлиғанлирини тветирда елан қилди. Роб шимитезниң билдүрүшичә, бу мәркәзниң миҗит маһмут исимлик мәсули бу орунда 20 яштин 40 яшқичә 1500 киши барлиқи, уларниң «ашқунлуқ идийәси билән юқумланғанлиқи», уларниң бу орунда 7 айдин бир йерим йилғичә туридиғанлиқини илгири сүргән. Миҗит маһмут мухбирларға йәнә бу орунниң қәшқәрдики бирдин-бир тәрбийәләш мәркизи икәнлики, «оқуғучилар» ниң һәр һәптә ахири өйигә қайтидиғанлиқини билдүргән. Лекин роб шимитезниң билдүрүшичә, бу орундики кишиләрниң мутләқ көп қисмиға бир йилдәк болған болуп, һечким өзлириниң қачан қоюп берилидиғанлиқини билмәйдикән.

Лагердики бир аял униңға балилириниң усул вә нахша ейтишиға йол қоймиғанлиқи үчүн бу йәргә йолланғанлиқини билдүргән. Йәнә бир әркәк, аялиниң ишлишигә йол қоймиғанлиқи сәвәблик бу йәргә киргәнликини илгири сүргән. Хитай һөкүмитиниң 2 милйондәк уйғур вә башқа милләтләрни йиғивелиш лагерлириға қамап, лагер сиртидики уйғурларни омумйүзлүк назарәт астиға елиши хәлқара җәмийәтниң қаттиқ тәнқидигә учриғандин кейин, у чәтәл дипломатлирини вә мухбирлирини бу орунларни зиярәт қилдурушқа башлиған. Лекин, хәлқара кишилик һоқуқ тәшкилатлириниң илгири сүрүшичә, хитай һөкүмити бу арқилиқ хәлқара җәмийәтниң көзини бойимақта икән. Йеқинда хәлқара кишилик һоқуқ көзитиш тәшкилати хәлқара җәмийәтни бу қилтаққа чүшмәсликкә чақирған иди.

Роб шимитезниң учури зор қизиқиш қозғап, лагерларға аит һәр хил соаллар қоюлди. Канададики хитай паалийәтчи шавен җаңниң йоллиған учурида илгири сүрүлүшичә, NPR мухбири зиярәт қилған бу орун қәшқәр йеңи шәһәрдики лагер икән. У бу лагерниң сим тосуқ вә көзитиш мунарлириниң бу йилниң башлирида елип ташланғанлиқини билдүрди.

Пикирләр (0)
Share
Толуқ бәт