Сиясий кеңәш рәисиниң тәлипи бойичә «муз таққа кәлгән меһман» операси көрситилди

Мухбиримиз үмидвар
2014-12-31
Елхәт
Пикир
Share
Принт


Хитай һөкүмитиниң «милләтләр иттипақлиқини күчәйтиш», «диний радикалиққа қарши туруш» тәшвиқатлириниң күчийишигә әгишип, хитай һөкүмити мәбләғ аҗритип ишләп чиқилған «муз таққа кәлгән меһман» операси 30 - декабир күни бейҗиңда турушлуқ уйғур елидин кәлгән уйғур вә башқа милләт оқуғучилири һәм кадирлири үчүн коллектип шәкилдә көрситилди.

Шинхуа агентлиқиниң хәвәр қилишичә, мәзкур операни бейҗиңда турушлуқ уйғур елидин кәлгән оқуғучилар вә кадирларға көрситиш паалийити хитай сиясий кеңишиниң рәиси, сияси бюру даимий һәйәт әзаси йү җеңшниң һавалиси билән мәхсус орунлаштурулған. Миллий ишлар комитети тәшкиллигән мәзкур паалийәткә бейҗиңда оқуватқан 1300 оқуғучи вә 500 кадир қатнаштурулған.

Бейҗиңдики дөләтлик чоң тиятирханида көрситилгән 150 минутлуқ мәзкур сәһнә әсири әсли өткән әсирниң 60 - йиллирида ишләнгән «муз таққа кәлгән меһман» кино филими асасида уйғур, хитай вә башқа милләт артислириниң қатнишиши билән нахша - музикилиқ операға өзгәртилгән иди.

Инкаслардин мәлум болушичә, даириләр мәзкур филимни милләтләр иттипақлиқини тәшвиқ қилишниң әң яхши классик үлгиси дәп қарап, зор мәбләғ аҗритип, опера вә көп қисимлиқ телевизийә тиятири қилип өзгәрткән шуниңдәк униңға аталмиш миллий бөлгүнчиликкә қарши туруш тәшвиқати қошулған иди.

Мәлум болушичә, сиясий бюру даимий һәйәт әзаси йү җеңшин мәхсус уйғур елидики хизмәтләргә, җүмлидин вәзийәтни контрол қилишқа мәсул қилинған.

Шинхуаниң хәвиридә,«бу опера кишиләрниң қәлбини титрәтти, кишиләрни тәрбийәгә игә қилди, һәр бир адәм милләтләр иттипақлиқини өз көз қарчуқини асриғандәк асраш, милләтләр иттипақлиқини өз һаятини қәдирлигәндәк қәдирлиши керәкликини чүшәнди» дәп баһа берилгән.

Пикирләр (0)
Share
Толуқ бәт