Тайланд мусапирлар мәркизидин қачқан уйғурлардин йәнә икки нәпири тутулуп қалған

Мухбиримиз әркин
2017-11-23
Елхәт
Пикир
Share
Принт

20‏-Ноябир күни тайландниң соңкила өлкиси садав чегра базиридики мусапирларни тутуп туруш мәркизидин қачқан уйғур мусапирлиридин йәнә икки нәпири бүгүн тайланд даирилиригә тутулуп қалған. 20‏-Ноябир таң сәһәрдә садав мусапирлар мәзкиридә тутуп турулуватқан уйғур мусапирлиридин 20 киши тайланд даирилириниң уларни узун мәзгил тутуп туруши вә хитайға қайтуруп беришидин әнсирәп қечип кәткән иди.

Уларниң мусапирлар мәркизидин қечиши билән кишилик һоқуқ тәшкилатлириниң диққити тайландтики 50-60 дәк уйғур мусапириниң тәқдиригә буралған. Тайланд даирилири сәйшәнбә күни қачқан уйғур мусапирлиридин 5 кишиниң тутулғанлиқи, қалған 15 кишиниң малайшия тәрәпкә өтүп кәткән болуши мумкинликини илгири сүргән иди. Бирақ «баңкок почта гезити» ниң пәйшәнбә күни хәвәр қилишичә, қечип кәткән 15 уйғур мусапиридин иккиси бүгүн садав базири әтрапида тутулуп қалған.

Хәвәрдә йәрлик кишиләрниң баян қилишичә, бу икки нәпәр уйғур чегра бойиға җайлашқан бир йезиниң әтрапидики җаңгаллиққа йошурунған болуп, бүгүн әтигәндә җаңгаллиқтин чиқип йезиға йемәклик сорап барғанда тутулуп қалған. Районлуқ сақчи идарисиниң башлиқи бумпас карнуй «баңкок почта гезити» гә бәргән учурида уларниң бириниң 22 яшта йәнә бир 24 яшта икәнлики, уларниң садав сақчи понкитиға тапшуруп берилгәнлики билдүрүлгән.

Тайланд кишилик һоқуқ тәшкилатлириниң билдүрүшичә, садав мусапирлар мәркизигә 25 уйғур мусапир қамалған болуп, улардин 5 нәпириниң саламәтлик әһвали еғир болғачқа, қалған 20 киши билән тәң қачалмиған икән. Тайланд «хәлқләрни һоқуқландуруш» намлиқ кишилик һоқуқ тәшкилатиниң директори шалида саҗороенсук чаршәнбә күни мухбиримизға бәргән учурида, уларни давалашқа кепилликкә қоюп беришни тәләп қилғанлиқини билдүргән иди.

Пикирләр (0)
Share
Толуқ бәт