«Вол-стрет журнили» гезити: «хитайниң мәдәнийәт қирғинчилиқи натсистларчә давам қиливатиду»

Мухбиримиз шөһрәт һошур
2019-03-29
Елхәт
Пикир
Share
Принт

«Вол-стрет журнили» гезити бүгүн хитайниң уйғур районида елип бериватқан мәдәнийәт қирғинчилиқи һәққидә бир мақалә елан қилди.

Мақалидә хитайниң мав зедуң дәвридә өзлиригә тәвә болған барлиқ қәдимий мәдәнийәт мираслирини уруп-чеқип бузуп ташлиғинидәк нөвәттә уйғур мәдәнийитиниму сүпүрүп ташлаш үчүн уйғур районида нәқ «мәдәнийәт инқилаби» усулида бузғунчилиқ елип бериватқанлиқи пакитлар билән оттуриға қоюлған.

Бу мақалиға қарита тәсиратини баян қилған бир қисим инкасчилар бүгүнки хитайни әйни чағдики натсистлар германийәсигә охшатқан. Аманда монат исимлик бир инкасчиниң баян қилишичә, гетлирму әйни чағда йәһудийларниң барлиқ мәниви мираслирини йоқитип, уларни пәқәтла музейға айландуруп қоюшқа урунған, һәтта у бир қетимлиқ сөзидә мәдәнийәткә қарита елип барған тазилаш һәрикитиниң әсли мәқсити йәһудиларни пүтүнләй йоқитиш вә изини қоймаслиқ икәнликини ашкара баян қилған. Тарихтики бу қара дағниң тәкрарланмаслиқи керәкликини тилға алған аманда хитай пүтүн бир хәлқни йоқитиветишниң алдида б д т ни һәрикәткә кәлтүрүш керәкликини тәкитлигән.

Доглас ливән исимлик йәнә бир инкасчи хитайниң аз санлиқ милләтләрни пәқәт көргәзмә буюми орнида ишлитишни халайдиғанлиқи, шуңа түрлүк мурасимларда аз санлиқ милләтләргә рәңдар кийимләрни кийдүрүп қоюш вә уларни нахша-уссулға селип қоюш билән чәклинидиғанлиқи, әмма уларниң һәқ-һоқуқини қилчиму ойлашмайдиғанлиқини ишарәтлигән. Җустин мари исимлик йәнә бир инкасчи хитайниң 5 миң йиллиқ мәдәнийәт тарихиниң дәврләр ара бир-бирини инкар қилиш тарихи икәнлики, кәлгүсидә хитай компартийәси йиқилиш билән бив вақитта мав зедуңниң һәйкилиниңму чеқилидиғанлиқи, бүгүн хитай чеқиватқанларниң у чағда қайта тиклинидиғанлиқини баян қилған.

Пикирләр (0)
Share
Толуқ бәт