Xitay hökümiti mahinur qasimini amérikaning "Uyghur kishilik hoquq qanun layihesi" ge qarshi sözletken

Muxbirimiz irade
2019-12-26
Élxet
Pikir
Share
Print

Amérika awam palatasi yéqinda "Uyghur kishilik hoquq qanun layihesi" ni yüksek awaz bilen qollighandin kéyin xitay da'iriliri Uyghur élida keng kölemde amérikani eyiblesh herikiti qozghighan.

Bu heriketke asasen hazirghiche Uyghur élidiki herderijilik rehbiriy kishiler, kadirlar we xelq ammisi hem shundaqla alliqachan pénsiyege chiqip bolghan Uyghur emeldarlarmu amérikaning bu herikitini eyibleshke sélinmaqta.

26- Dékabir küni xitayning "Tengritagh" torida yene 1940-yillardiki sherqiy türkistan inqilabi rehberliridin merhum exmetjan qasimining repiqisi, xitay memliketlik ayallar birleshmisining sabiq mu'awin re'isi, Uyghur aptonom rayonluq xelq qurultiyi da'imiy komitétining sabiq mu'awin mudiri mahinur qasim xanimning bayanati élan qilin'ghan.

"Közümni roshenleshtürüp, heq - naheqni éniq ayrip, amérika terepning rezil niyitini qet'iy pash qilimen we tenqid qilimen" mawzusida élan qilin'ghan mezkur maqalide mushu xildiki eyiblesh maqaliliride ortaq qolliniwatqan ibariler arqiliq amérika "Xitayning ichkiy ishlirigha arilishish", "Térorluq mesiliside ikki xil ölchem ishlitish" bilen eyiblen'gen. Mahinur xanimning maqaliside "Amérika terep güllen'gen, muqim shinjangni körüshni xalimay, ochuq - ashkara pakit oydurup chiqip,...Shinjangning térrorluqqa qarshi turush, esebiylikni tügitish üchün körsetken ghayet zor tirishchanliqigha zeherxendilik bilen hujum qildi, shinjangning kishilik hoquq ishlirida qolgha keltürgen ghayet zor muweppeqiyetlirige qesten töhmet qildi," dégen sözler orun alghan.

Halbuki, bu yil 6- ayda exmetjan qasimining hazir awstraliyede yashawatqan chewrisi nuriye qasimi öz a'ilisining ehwalini asas qilip turup, chet'ellerdiki Uyghur jama'itining yurtidiki uruq - tughqanliri bilen alaqe qilalmasliq qatarliq sewebler tüpeyli uchrawatqan éghir rohiy bésimi heqqqide guwahliq bergen idi. Nuriye qasimi shu qétim  padishahliq mélburn téxnologiye instituti qarmiqidiki "Sheher zhurnili" ning 10-iyun sanigha bésilghan maqalide qilghan sözide "Yéqinda bir tughqinimizning tügep ketkenlikini apammu bashqilardin anglaptu," dégen. Shundaqla apisining héchqandaq tughqanliri bilen alaqilishish imkanining bolmighanliqi yaki weten'ge bérip depne murasimigha qatnishalmighanliqini sözlep bergen.

Toluq bet