Американиң «ABC» қанилида уйғур елидики лагерлар мәсилиси һәққидә программа тарқитилди

Мухбиримиз ирадә
2019-08-29
Елхәт
Пикир
Share
Принт

Американиң «ABC» қанили 29-авғуст күни уйғур елидики лагерлар мәсилиси һәққидә наһайити тәпсилий ишләнгән зор һәҗимлик бир программа тарқатти. Мәзкур программа вектор ордонез қатарлиқ бир қисим мухбирларниң уйғур ели вә шундақла қазақистанға қилған биваситә зиярити вә шундақла лагер шаһитлири вә йеқинлири лагерға тутулғанларни зиярәт қилиш асасида ишләнгән.

Программида йәнә америка ташқи ишлар министири майк помпейо, тәтқиқатчи адриян зениз, дәррин байлер, кишилик һоқуқни көзитиш тәшкилати хитай ишлири бөлүминиң директори софи ричардсон қатарлиқларму зиярәт қилинип, уларниң лагерлар һәққидики тәтқиқат вә баһалири тонуштурулған.

Мухбирлар уйғур елидики зиярити мәзгилидә сақчиларниң қаттиқ назарәт қилишиға учриған болуп, уларниң әркин һалда гугул хәритисидә орни бәлгиләп чиқилған лагерларни сүрәткә елиши мумкин болмиған. Мухбирлар хитай даирилири тәрипидин алдин орунлаштурулған вә йепиқ «тәрбийә мәркәзлири» икәнлики илгири сүрүлгән орунларда зиярәткә орунлаштурулған. Әмма мухбирлар баянида бу орунларниң гугул хәритисидә көрүнгән лагерлар әмәсликини әскәртип, хитай сақчидин өзини шу йәрләргә апиришни тәләп қилған, хитай хадим униңға «келәр қетим кәлгиниңиздә апирай» дәп җаваб бәргән.

Америка ташқи ишлар министири майк помпейо болса программидики сөзидә бу орунларниң йиғивелиш лагерлири икәнликини вә уйғур мусулманлириниң меңә ююшқа дучар болуватқанлиқини билдүргән. Башқа тәтқиқатчилар вә лагер шаһитлириму өз баянлирида уйғур елидики лагерларда тутқунларниң җисманий вә роһий җәһәттин қейин-қистаққа елиниватқанлиқини, хитай һөкүмитиниң түрлүк усуллар арқилиқ пакитни йошурушқа тиришиватқанлиқини баян қилған.

Программида уйғурларниң нөвәттики җиддий вәзийити тәпсилий йорутуп берилгән.

Пикирләр (0)
Share
Толуқ бәт