«Ню-йорк вақти гезити» лагерларниң давамлиқ кеңәйтиливатқанлиқини илгири сүрди

Мухбиримиз әркин
2019-08-12
Елхәт
Пикир
Share
Принт

«Ню-йорк вақти гезити» өткән шәнбә күни уйғурлар һәққидә хәвәр елан қилип, хитай һөкүмити «қайта тәрбийәләш мәркәзлири» дәп келиватқан лагерларниң тақилиши уяқта турсун, техиму кеңийиватқанлиқини илгири сүргән.

Хәвәрдә «ню-йорк вақти гезити» мухбирлириниң районда 7 күнлүк зиярәт елип берип, хитай истибдат рәһбири ши җинпиң тәрипидин қурулған лагерлар ториниң изчил мәшғулат елип бериватқанлиқи вә кеңийиватқанлиқини байқиғанлиқи тәкитләнгән. Йеқинда уйғур аптоном райониниң рәиси шөһрәт закир билән муавин рәиси әркин тунияз лагердики 90 пирсәнт тутқунниң қоюп берилип, җәмийәткә қайтқанлиқини елан қилған иди.

Лекин көзәткүчиләр вә шаһитлар уларниң сөзиниң раст болуши гуманлиқ дәп қаримақта. «Ню-йорк вақти гезити» ниң хәвиридә хитай һөкүмити очуқ-ашкара болушқа вәдә қилған болсиму, лекин райондики чоң-кичик лагерларниң йәнила қаттиқ бихәтәрлик вә мәхпийәтлик астида контрол қилинидиғанлиқи, хотән әтрапида чоң типлиқ 5 лагер барлиқини билдүргән. Хәвәрдә баян қилинишичә, мухбирлар сүний һәмрада тартилған рәсимләрдин хотәндики бир лагерниң қарши тәрипигә йәнә бир йеңи лагер селинғанлиқини байқиған. Хәвәрдә «ню-йорк вақти гезити» мухбирлириниң бу лагерлар вә униң әтрапидики завутларға һәмдә башқа җайлардики диний орунларға йеқинлишишқа урунған болсиму, бирақ сақчиларниң ғәлитә сәвәбләрни көрситип тосушиға учриғанлиқи тәкитләнгән.

Хәвәрдә баян қилинишичә, йәрлик даириләр мухбирларни «қайта тәрбийәләш мәркизи» дә йетип чиққан 25 яшлиқ абдувәли кәбир исимлик бир уйғур яшниң «өйи» дә униң билән сөһбәтлишишкә орунлаштурған. Хәвәрдә бу яшниң хитай һөкүмитиниң тәшвиқатидики сөзләрни тәкрарлиғанлиқи, бу өйниң униң өйи икәнлики мухбирларда гуман қозғиғанлиқи тәкитләнгән. Хәвәрдә қәйт қилишичә, мухбирлар шу сөһбәттин бир қанчә саәт кейин бу яшни өйгә издәп барған болсиму, уни тапалмиған. Хәвәрдә абдувәли кибир аяли вә униң 2 яшлиқ қизиниң бу өйдә әмәсликини билдүргән.

Пикирләр (0)
Share
Толуқ бәт