Prézidént tramp kim jung'un bilen uchrishishni bikar qildi

Muxbirimiz irade
2018-05-24
Élxet
Pikir
Share
Print

Amérika prézidénti tramp peyshenbe küni shimaliy koréye rehbiri kim jung'un bilen kéler ay ötküzülüshi pilan qilin'ghan uchrishishini bikar qilghanliqini jakarlidi.

"Washin'gton pochtisi" gézitining xewiridin qarighanda, prézidént tramp mezkur qararining sewebini chüshendürgende shimaliy koréyening amérikigha bolghan ochuq-ashkara öchmenlikini tilgha alghan we "Bundaq bir shara'itta men shimaliy koréye bilen uzundin béri pilan qiliniwatqan uchrishishni ötküzüshni toghra, dep qarimaymen" dégen.

Amérika prézidénti trampning shimaliy koréye rehbiri kim jung'un bilen 12-iyun sin'gaporda uchrishidighanliqi jakarlan'ghan. Eger mezkur uchrishish emelge ashqan bolsa, bu amérika prézidénti bilen shimaliy koréye rehbirining tunji qétim uchrishishi bolush bilen birge, prézidént trampning yarqin diplomatik utuqliridin biri bolup qalidu, dep qaralghan idi.

Prézidént tramp bügün aqsarayda muxbirlargha qilghan sözide, "Shimaliy koréyening herqandaq bir exmiqane herikitige qarshi amérika armiyesining tedbir qollinishqa teyyarliqini bildürgen. Emma u sözide yene, shimaliy koréye rehbiri kim jung'un bilen koréye yérim arilini yadrosizlandurush toghrisida muzakire élip bérishi mumkinlikinimu bildürgen.

Prézidént trampning qararidin kéyin, jenubiy koréye prézidénti munja'in derhal dölet erbablirini jiddiy yighin'gha chaqirghan. U axbaratqa qilghan bayanatida özining bu uchrishishning bikar qilin'ghanliqidin epsuslan'ghanliqini bildürgen.

"Washin'gton pochtisi" ning éytishiche, prézidént trampning yighinni bikar qilishigha shimaliy koréyening yéqinda amérikini uchrishishni qayta oyliship béqish bilen tehdit qilishi we shundaqla "Amérika biz bilen ya yighin zalida körüshüshke ya, yadro urushida tutushushqa qarar qilishi kérek" dégen sözlerni qilishi seweb bolghan iken.

Uning üstige shimaliy koréye terepning yighin heqqidiki orunlashturushlargha waqtida jawab bermeslikimu aqsarayning endishilirini kücheytken. Prézidént tramp kim jung'un'gha yazghan xétide "Pütün dunya, bolupmu shimaliy koréye uzun muddetlik tinchliq we paraghet üchün kelgen zor bir pursetni qoldin bérip qoydi" dégen.

Toluq bet