Президент трамп ким җуңун билән учришишни бикар қилди

Мухбиримиз ирадә
2018-05-24
Елхәт
Пикир
Share
Принт

Америка президенти трамп пәйшәнбә күни шималий корейә рәһбири ким җуңун билән келәр ай өткүзүлүши пилан қилинған учришишини бикар қилғанлиқини җакарлиди.

«Вашингтон почтиси» гезитиниң хәвиридин қариғанда, президент трамп мәзкур қарариниң сәвәбини чүшәндүргәндә шималий корейәниң америкиға болған очуқ-ашкара өчмәнликини тилға алған вә «бундақ бир шараитта мән шималий корейә билән узундин бери пилан қилиниватқан учришишни өткүзүшни тоғра, дәп қаримаймән» дегән.

Америка президенти трампниң шималий корейә рәһбири ким җуңун билән 12-июн сингапорда учришидиғанлиқи җакарланған. Әгәр мәзкур учришиш әмәлгә ашқан болса, бу америка президенти билән шималий корейә рәһбириниң тунҗи қетим учришиши болуш билән биргә, президент трампниң ярқин дипломатик утуқлиридин бири болуп қалиду, дәп қаралған иди.

Президент трамп бүгүн ақсарайда мухбирларға қилған сөзидә, «шималий корейәниң һәрқандақ бир әхмиқанә һәрикитигә қарши америка армийәсиниң тәдбир қоллинишқа тәйярлиқини билдүргән. Әмма у сөзидә йәнә, шималий корейә рәһбири ким җуңун билән корейә йерим арилини ядросизландуруш тоғрисида музакирә елип бериши мумкинликиниму билдүргән.

Президент трампниң қараридин кейин, җәнубий корейә президенти мунҗаин дәрһал дөләт әрбаблирини җиддий йиғинға чақирған. У ахбаратқа қилған баянатида өзиниң бу учришишниң бикар қилинғанлиқидин әпсусланғанлиқини билдүргән.

«Вашингтон почтиси» ниң ейтишичә, президент трампниң йиғинни бикар қилишиға шималий корейәниң йеқинда америкини учришишни қайта ойлишип беқиш билән тәһдит қилиши вә шундақла «америка биз билән я йиғин залида көрүшүшкә я, ядро урушида тутушушқа қарар қилиши керәк» дегән сөзләрни қилиши сәвәб болған икән.

Униң үстигә шималий корейә тәрәпниң йиғин һәққидики орунлаштурушларға вақтида җаваб бәрмәсликиму ақсарайниң әндишилирини күчәйткән. Президент трамп ким җуңунға язған хетидә «пүтүн дуня, болупму шималий корейә узун муддәтлик тинчлиқ вә парағәт үчүн кәлгән зор бир пурсәтни қолдин берип қойди» дегән.

Пикирләр (0)
Share
Толуқ бәт