Уйғур әдәбиятиға беғишланған универсал әдәбий журнал - «из» ниң тунҗи сани йоруқ көрди

Мухбиримиз қутлан
2017-08-27
Елхәт
Пикир
Share
Принт

Муһаҗирәттики уйғур билим адәмлириниң тиришчанлиқи арқисида уйғур әдәбиятиға беғишланған универсал әдәбий журнал - «из» ниң тунҗи сани йеқинда истанбулда йоруқ көрди.

Мәзкур журнал истанбулдики уйғур билим адәмлиридин мурат орхунниң саһиблиқида чиқирилған болуп, муйәссәр абдуләхәт хәндан баш муһәррирликни, муһаҗирәттики уйғур зиялийлиридин 15 киши тәһрир һәйәтликини үстигә алған.

Мәзкур әдәбий журналниң биринчи бети абдурәһим өткүрниң «из» намлиқ шеири билән башланған болуп, униңда абдурәһим өткүр хатирисигә, балиларға атап, һекайиләр бағчиси, шеирийәт гүлзари, билим вә тәтқиқат, әдәбий учурлар қатарлиқ мәхсус сәһипиләр ечилған.

«Из» журнилиниң тунҗи санида уйғур дияридики язғучи-шаирларниң йеқинқи надир иҗадийәтлиридин өрнәкләр берилгән болуп, униңда йәнә муһаҗирәттики уйғур қәләмкәшлириниң әдәбий вә илмий әсәрлириму орун алған.

Журнал тәһрир бөлүминиң «из» журнили һәққидә бәргән тәһрир илависидә мундақ дейилгән: «мәзкур журнал уйғур әдәбиятини өз ичигә алған дуня әдәбиятидики классик вә надир әсәрләрни оқурмәнләргә тәқдим қилиш, уйғур тилида иҗадийәт билән шуғуллинидиған кәсип игилири вә һәвәскарларниң әсәрлирини елан қилиш, уйғур әдәбияти вә әдәбий тилини башқа түрк милләтлиригә тонуштуруш шундақла уйғур тилидики бир журнални мәзмун вә сүпәт җәһәттин тәрәққий қилдуруп, хәлқарадики сүпәтлик әдәбий журналларниң сәвийәсигә йәткүзүшни мәқсәт қилған пәсиллик әдәбий журналдур.»

Пикирләр (0)
Share
Толуқ бәт