Кишилик һоқуқни көзитиш тәшкилати «ислам һәмкарлиқ тәшкилати» ни уйғур районидики кишилик һоқуқ дәпсәндичиликигә қарши турушқа чақирди

Мухбиримиз әркин
2019-10-21
Елхәт
Пикир
Share
Принт

Кишилик һоқуқни көзитиш тәшкилати баянат елан қилип, б д т кишилик һоқуқ кеңишигә әза дөләтләрни, болупму «ислам һәмкарлиқ тәшкилати» ни уйғур районидики мусулманларниң кишилик һоқуқиниң еғир дәпсәндә қилинишиға қарши турушқа чақирған.

Баянатта: «биз әза дөләтләрни болупму ислам һәмкарлиқ тәшкилатини шинҗаңдики мусулманларға қаритилған кәң көләмлик кишилик һоқуқ дәпсәндичиликигә қарши сөз қилишқа чақиримиз. Кишилик һоқуқ алий комиссариниң районда чәклимисиз мустәқил тәкшүрүш елип берип, районниң вәзийити һәққидә мәлумат елиш тоғрисидики чақириқини қоллаймиз» дейилгән.

Баянатта йәнә, түркийәдә турушлуқ уйғур мусапир нурмәмәт тохтиниң аилиси мисал кәлтүрүлүп, нөвәттә уйғур балилирини ата-анилардин мәҗбурий айриветилишиниң тәхирсиз мәсилисигә айланғанлиқи тәкитләнгән. Нурмәмәт тохтиниң аяли билән икки пәрзәнти 2016‏-йили аниси билән юртиға туғқан йоқлашқа қайтип ғайиб болған. У, бу йилниң башлирида 4 яшлиқ оғлини хитайниң бир син тәшвиқат көрүнүшидин тонуп қалғаниди. Кишилик һоқуқни көзитиш тәшкилатниң 18‏-өктәбир елан қилинған баянатида тәкитлинишичә, «райондики мусулман балилириниң ата-анилиридин мәҗбурий айриветилип, тутуп туруш мәркәзлиридәк тикәнлик сим вә камералар орунлаштурулған тәрбийәләш орунлириға йәрләштүргәнлики, улардин хитайниң тәшвиқат нахшисини ейтип, усул ойниши тәләп қилинидиғанлиқиға даир хәвәрләрдин кейин, буниңға қарита кишилик һоқуқ кеңишиниң дәрһал һәрикәткә өтүши техиму җиддий мәсилигә айланған.»

Мәзкур тәшкилат бу йил 9‏-айда җәнвәдә өткүзүлгән б д т кишилик һоқуқ кеңишиниң 42‏-нөвәтлик йиғинидиму бу мәсилини оттуриға қойғаниди. Бу йил 6‏-айда б д т кишилик һоқуқ кеңишигә әза 25 дөләтниң кишилик һоқуқ кеңиши президенти вә кишилик һоқуқ алий комиссариға мәктуп йезип хитайниң уйғур районида кишилик һоқуқни еғир дәпсәндә қиливатқанлиқиға қарита чоңқур әндишисини ипадилигән. Арқидинла шималий корейә, венузелла, сүрийә, бирма қатарлиқ дөләтләрниң мәктуп йезип, хитайни қоллиғанлиқини билдүргәниди. Кишилик һоқуқни көзитиш тәшкилатиниң тәкитлишичә, хитайни қоллиған бу мәктупқа ислам һәмкарлиқ тәшкилатиға әза дөләтләрниң йерими имза қоюшни рәт қилған болуп, бу уларға илһам бәргән.

Пикирләр (0)
Share
Толуқ бәт