Муһәммәт махатир: «хитай күчлүк болғачқа мусулман дөләтләр уйғурларниң гепини қилалмайватиду»

Мухбиримиз әркин
2019-09-30
Елхәт
Пикир
Share
Принт

Малайсия баш министири муһәммәт махатир хитай иқтисади вә һәрбий күчи бәк күчлик болғачқа мусулман дөләтлириниң уйғур мәсилисидә уни тәнқид қилишқа җүрәт қилалмайватқанлиқини илгири сүргән.

Муһәммәт махатир бу сөзләрни мусулман дөләтләр кәшмир, роһинга, пәләстин қатарлиқ мәсилиләрдә актип ипадә билдүрүп, уйғур мәсилисигә кәлгәндә көзини юмувелиш билән әйиблиниватқан мәзгилдә қилған. У техи өткән һәптә б д т омумий кеңишидә сөз қилип, кәшмир, роһинга мәсилилирини оттуриға қойған, әмма уйғур мәсилисини тилға алмиған иди.

Бенар «хәвәрләр агентлиқи» ниң билдүрүшичә, махатир27‏-сентәбир ню-йорк шәһиридә «бинар хәвәрлири» мухбириниң уйғурлар һәқтики соалиға җаваб берип, «чүнки хитай бәк күчлүк дөләт. . . Сиз оңушлуқ болмайдиған бир ишни билип туруп синап бақсиңиз яки қилсиңиз болмайду. Шуңа сизниң хитайниң ғәзипини қозғимайдиған силиқрақ бир йолни тутқиниңиз яхши. Чүнки хитай һәммимизгә мәнпәәт бериватқан бир дөләт,» дегән.

Униң илгири сүрүшичә, хитай мусулман дөләтлириниң чоң сода шерики болуп, улар буниңға тәсир қилидиған ишларни қилишни халимайдикән. У «буниңға тәсир йәтсә, биз зиянға учраймиз» дегән. Махатирниң америка қатарлиқ дөләтләр хитайниң һәрикитини «бу әсирдики әң чоң кишилик һоқуқ дәпсәндичилики» дәп тәрипләватқан бир мәзгилдә бу сөзләрни қилиши дәрһал кишилик һоқуқни көзитиш тәшкилатиниң тәнқидигә учриған. Мәзкур тәшкилатниң асия ишлириға мәсул муавин директори фил робертсонниң билдүрүшичә, махатирдәк бир шәхсниң тилини йиғиши хитайниң тәнқидчиләрни қорқутушта қанчилик зор қәдәмләрни алғанлиқини көрситидикән. У «ислам һәркарлиқ тәшкилатиниң башқа әзалириға охшаш малайсияму уйғурлар тоғрисидики һәқиқәтни сөзләшкә кәлгәндә бейҗиңниң бесимиға баш әгмәктә,» дегән. Униң көрситишичә, «махатир өзиниң сүкүтини бузуп, уйғурларниң кишилик һәқ-һоқуқи вә диний әркинликниң бузғунчилиққа учришини тәнқид қилиши керәк,» икән.

Пикирләр (0)
Share
Толуқ бәт