Хитай һөкүмити илһам тохтиниң «васлав хавел мукапати» ға намзатлиққа талланғанлиқиға наразилиқ билдүрди

Мухбиримиз әркин
2019-08-30
Елхәт
Пикир
Share
Принт

Хитай һөкүмити явропа кеңишиниң түрмидики атақлиқ уйғур зиялийси илһам тохтини «васлав хавел кишилик һоқуқ» мукапатиниң намзатлиқиға таллиғанлиқиға наразилиқ билдүргән. Хитай ташқи ишлар министирлиқи 29‏-авғуст күни баянат елан қилип, явропа кеңишини 2014‏-йили «бөлгүнчилик» билән әйиблинип муддәтсиз қамақ җазасиға һөкүм қилинған илһам тохтиниң намзатлиқини бикар қилишқа чақирған.

Явропа кеңишиниң һәйәтләр йиғини 26‏-авғуст күни чехийә пайтәхти прагада баянат елан қилип, илһам тохтиниң уйғур мәсилисидә, шундақла милләтләр арисидики диалогни алға сүрүштә көрсәткән тиришчанлиқини көздә тутуп, 2019‏-йиллиқ «васлав-хавел кишилик һоқуқ мукапати» ниң намзатлиқиға лайиқ көрүлгәнликини җакарлиғаниди. Фирансийә агентлиқиниң хәвәр қилишичә, нөвәттә явропа кеңиши сабиқ чехийә президенти васлав хавелниң намиға тәсис қилинған бу мукапатқа 3 намзатни таллиған.

Қалған икки намзатлиққа таҗикистанлиқ адвокат бузүрмеһри яров билән балқандики бир яшлар тинчлиқ тәшкилати талланған. «Васлав хавел кишилик һоқуқ мукапати» илһам тохти бу йил намзатлиққа көрситилгән бирдин-бир мукапат әмәс. У бу йил 1-айда америка дөләт мәҗлисиниң бәзи әзалири тәрипидин нобел тинчлиқ мукапатиға намзатлиққа көрситилгәниди. Хитай ташқи ишлар министирлиқи баянатчиси гең шуаң ташқи ишлар министирлиқиниң пәйшәнбә күнки ахбарат йиғинида, бу йил 49 яшлиқ илһам тохтини «террорлуқни қоллиған бөлгүнчи» дәп әйиблигән.

У, алақидар органларни «илһам тохтиниң намзатлиқини бикар қилишқа, бөлгүнчилик вә террорлуқни қоллашни тохтитишқа чақиридиғанлиқи» ни билдүргән. Илһам тохти хитай һөкүмити «террорлуқ вә әсәбийлик» кә қарши турушни баһанә қилип, 2 милйондәк уйғур вә башқиларни йиғивелиш лагерлириға қамиған, униң қилмиши хәлқара қаттиқ әйибләшкә учраватқан бир мәзгилдә намзатлиққа талланди. Фирансийә агентлиқиниң билдүрүшичә, бу мукапатниң еришкүчиси франсийәниң сратборг шәһиридә 30‏-сентәбир күни, йәни хитай дөләт байриминиң һарписида елан қилинидикән.

Пикирләр (0)
Share
Толуқ бәт