Хитайниң мәһбусларниң ички әзалирини мәҗбурий көчүрүш сиясити йәнә ғулғула пәйда қилди

Мухбиримиз ирадә
2016-08-18
Елхәт
Пикир
Share
Принт

Ички әза көчүрүш оператсийисигә даир хәлқаралиқ илмий муһакимә йиғини хоңкоңда ечилиш алдида туруватқанда, бир қисим мутәхәссисләр хитай һөкүмитиниң өлүм җазасиға һөкүм қилинған мәһбусларниң ички әзалирини мәҗбурий еливелиш һәрикитини йәнә бир қетим күн тәртипкә елип кәлди. Улар шундақла бундақ бир йиғинниң хитайға тәвә земинда ечилишиниму ақиланилик әмәс, дәп әйиблиди.

Хитай даирилири 2015-йили 1-январдин етибарән өлүмгә һөкүм қилинған мәһбусларниң ички әзалирини мәҗбурий еливелишни қанун бойичә тохтатқанлиқини елан қилған. Бирақ, нюйорк вақти гезитиниң хәвиридин қариғанда, мәзкур йиғин ечилиштин бир күн бурун йәни 17-авғуст чаршәнбә күни бир қисим дохтурлар вә һөкүмәткә тәвә болмиған теббий тәшкилатларниң әзалири «америка ички әза көчүрүш оператсийиси журнили» да елан қилған хетидә хитайда бу қанунниң қанчилик дәриҗидә иҗра қилиниватқанлиқиниң ениқ әмәсликини тәкитлигән. Униңда мундақ дейилгән: «һазирқи әһвалдин елип ейтқанда, хитайда елан қилинған өзгиришниң һәқиқәтән иҗра қилиниватқанлиқини испатлаш мумкин әмәс. Шуңа бундақ әһвал астида хитайни әхлақий җәһәттин бу кәсиптики шерикимиз, дәп тонуш ақиланилик әмәс. Биз қачан мустәқил һалда, испатлири билән хитайда ички әза йөткәшниң әхлақ өлчәмлиригә уйғун һалда көчүрүлүватқанлиқини испатлимиғучә, теббий саһәдикиләрниң хитайға академик ембарго қоюши биз үчүн кәспий бурчтур.»

Мәлум болушичә, хитайниң ички әза көчүрүш тәрәққият фонди җәмийитигә қарашлиқ тор бәттә мушу йилниң 5-ейида «мәһбуслар органлирини ианә қилса болиду» дәйдиған мәзмун елан қилинған икән. Нюйорк вақти гезити бу фонди җәмийәткә телефон қилған болсиму, әмма җаваб алалмиған.

Бүгүн, хитайниң һөкүмәт авази һесаблинидиған шинхуа ториму бир мақалә елан қилип, хитайда бу йилниң алдинқи йеримида 1795 қетим ички әза ианә қилинип, алдинқи йилға қариғанда 45 пирсәнт өрлигәнликини хәвәр қилди.

Хәлқара кишилик һоқуқ органлири хитайда ички әзаларни мәҗбурий көчүрүш сиясити бойичә фалунгуң муритлири билән уйғур сиясий мәһбуслириниң әң көп зиянкәшликкә учриғанлиқини илгири сүриду.

Пикирләр (0)
Share
Толуқ бәт