Xitay ichki organ köchürüsh da'irilirining watikan'gha teklip qilinishi tenqidke uchridi

Muxbirimiz erkin
2017-02-07
Élxet
Pikir
Share
Print

Sabiq mu'awin xitay sehiye ministiri, xitay ichki organ köchürüsh jem'iyitining bashliqi xu'ang jyéfu seyshenbe küni watikanda ötküzülgen yighinda wede bérip, mehbuslarning ichki ezalirini mejburiy élip köchürüsh qattiq jazalinidighanliqini bildürgen.

Xu'ang jyéfu watikandiki yighin'gha xitaydiki qanun, sehiye we ammiwi teshkilatlarning 80 kishilik bir wekiller ömiki bilen kélip qatnashqan. U, öz teshkilatining mejburiy ichki eza köchürüshke yol qoymaydighanliqini bildürüp, "Biraq, xitay 1milyard 300milyon nopusluq chong dölet. Shübhisizki, qanun'gha xilap bezi qilmishlarning bolushi turghan gep. Lékin qanun'gha xilapliq qilghanlar bolsa qattiq jazalinidu" dégen.

Xitay hökümiti 2015‏-yildin bashlap mehbuslarning ichki ezalirini mejburiy köchürüshni toxtitishqa wede bergen. Emma pa'aliyetchiler xitayning buninggha emel qilmighanliqini ilgiri sürüp kelgen idi.

Watikanning xitay wekiller ömikini bu yighin'gha teklip qilishi, xelq'ara mejburiy ichki organ köchürüshke qarshi doxturlar jem'iyitining tenqidige uchridi. Roytérsning xewer qilishiche, mezkur teshkilat seyshenbe küni bayanat élan qilip, "Xitayda mejburiy ichki eza köchürüshning toxtitilghanliqigha da'ir héchqandaq delil yoq" dégen. Bu teshkilatning ijra'iye diréktori toréstén tréyning qeyt qilishiche, "Ochuq -ashkara bolmay turup, atalmish bu islahatni delillesh imkansiz" iken.

Uyghur pa'aliyetchilirining bildürüshiche, xitay hökümiti mehbuslarning ichki ezalirini mejburiy élishni eng burun Uyghurlardin bashlighan. Bu 1999‏-yiligha kelgende falun'gung muritlirigha buralghan.

Toluq bet