Уйғур аптоном районида йеқинқи 4 йил ичидә аран 23 адәм ички әзасини ианә қилған

Мухбиримиз әркин
2017-09-15
Елхәт
Пикир
Share
Принт

Уйғур аптоном райони 2013‏-йилдин башлап адәм ички әзалирини ианә қилиш хизмитини башлиған. Бирақ ианә қилиш хизмити башланған йеқинқи 4 йилдин бери аран 1000 ға йеқин адәм ички әза ианә қилишқа илтимас қилған. Бу җәрянда аран 23 адәм ички әзасини ианә қилған.

Хитай ахбарат васитилириниң билдүрүшичә, ички әза ианә қилған бу 23 адәмниң әң кичики 3 яш, әң чоңи 73 яшта икән.

Үрүмчидә чиқидиған «шинҗаң мәркизий шәһәр гезити» ниң пәйшәнбә күни бәргән хәвиридә, уйғур аптоном райониниң адәм ички әзалирини ианә қилиш хизмитини қелиплаштурушқа башлиғанлиқини билдүргән. Хәвәрдә қәйт қилишичә, шу мунасивәт билән аптоном районлуқ қизил крест җәмийити 12‏-сентәбир күни үрүмчидә мәмликәтлик адәм ички әзалирини ианә қилишни маслаштурғучи хадимларниң мәмликәтлик тәрбийиләш курсини ачқан.

Бирақ хитайниң ички әза көчүрүш хизмити бәзи хәлқара кишилик һоқуқ паалийәтчилири вә хитай өктичилириниң тәнқидигә учрап кәлгән. Уларниң қаришичә, хитайда адәм ички әзалирини көчүрүши наһайити чоң сода болуп, униңда хитайниң тәптиш, сот, җ х, әдлийә органлири вә бәзи дохтурханилириниң қоли бар икән. Улар, фалунгоңчилар вә өлүм җазасиға һөкүм қилинған уйғурлар вә башқа мәһбусларниң хитайдики ички әза билән тәминләшниң асаслиқ мәнбәси икәнликини қәйт қилип кәлгән.

Хитай һөкүмити 2015‏-йили 1‏-башлап мәһбусларниң ички әзасини ишлитишни тохтатқанлиқини билдүрүп, бу һәқтики тәнқидләрни рәт қилип кәлгән болсиму, әмма хитайда һәр йили өлүм җазаси берилгән мәһбусларниң санини изчил мәхпий тутуп кәлди.

Уйғур аптоном райониниң адәм ички әзалири ианә қилишни башқуруш мәркизи 2015‏-йили қурулған. «Шинҗаң мәркизий шәһәр гезити»ниң хәвиридә билдүрүшичә, 12‏-сентәбир үрүмчидә башланған курсқа хитайниң һәр қайси өлкилиридин 97 курсант қатнашқан болуп, уларға курсни пүттүрсә, гуваһнамә тарқитип берилидикән.

Пикирләр (0)
Share
Толуқ бәт