Һиндонезийә һөкүмити уйғурларни дәп «хитайниң ишлириға арилашмайдиғанлиқи» ни билдүрди

Мухбиримиз әзиз
2019-12-24
Елхәт
Пикир
Share
Принт

Хитай һөкүмитиниң уйғурлардики ислам етиқади билән бағлинишлиқ болған барлиқ адәтләрни «террорлуқ вә әсәбийлик» кә бағлап бастуруши хәлқараниң күчлүк тәнқидигә учриғандин кейин бир қисим мусулман дөләтлири өзлириниң бу мәсилидики әндишилирини һәр хил шәкилдә оттуриға қоюп кәлгәниди. Һиндонезийә һөкүмити болса бу җәһәттә әң күчлүк инкас қайтурған ислам дөлитиниң бири болуш сүпити билән мусулманлар дунясиға үлгә болған иди.

Йеқинқи мәзгилләрдин буян һиндонезийәдики мусулманлар аммиси уйғурлар дуч келиватқан сиясий бастурушниң барғансери вәһшиянә түс еливатқанлиқи сәвәблик көп қетимлап зор көләмлик намайиш паалийити тәшкиллигән һәмдә һөкүмәтни бу мәсилидә кәскинрәк ипадә билдүрүшкә чақирип кәлгән иди.

23-Декабир күни һиндонезийә президенти җоко видоониң баш катипи молдоко бу мәсилигә җаваб берип «биз шинҗаңдики уйғурлар үчүн хитайниң ички ишлириға арилишалмаймиз,» дәп ипадә билдүрди. Молдоко бу һәқтә техиму тәпсилий қилип «һәммила дөләтниң ички ишлирини бир яқлиқ қилиш һоқуқи болиду. Шуңа биз хитайниң бу һоқуқиға һөрмәт қилимиз,» дегән.

Буниңдин илгири хитай һөкүмитиниң һиндонезийә мусулманлар өмикини уйғур дияриға лагерларни екскурсийә қилишқа тәшкиллигәнлики, бу җәрянда өмәк әзалирини иқтисадий җәһәттә «рази қилғанлиқи» һәққидә көплигән хәвәрләр чиққан иди. Әмма һиндонезийә тәрәп буни қәтий инкар қилған иди.

«Бенар хәвәрлири» ниң 24-өктәбирдики хәвиридә ейтилишичә, өткән һәптә хитайниң һиндонезийәдики баш әлчиси шяв чйән уйғурлар мәсилиси һәққидә «чүшәнчә һасил қилиш» үчүн молдоко билән айрим сөһбәттә болған. Сөһбәттин кейин өткүзүлгән мухбирларни күтүвелиш йиғинида шяв чйән «шинҗаңда уйғурларниң һәқ вә һоқуқлири дәпсәндә болуватиду, дегән хәвәрләр пүтүнләй ойдурма гәпләр,» дегән.

Дәрвәқә, һиндонезийәдики ислам тәшкилатлири вә авам хәлқ уйғурларни қоллаш үчүн түрлүк паалийәтләрни давам қилдуруватқан болуп, һөкүмәтниң бу һәқтики қарари билән рошән селиштурма һасил қилмақта икән.

Пикирләр (0)
Share
Толуқ бәт